Zgjidhje e re për jurisprudencën: 12 provime në shqip dhe dy në maqedonisht, studentët kërkojnë plotësi

Ministria e Drejtësisë ka dalë me një propozim të ri për studentët, sipas të cilit provimi i jurisprudencës do të mund të jepet në 12 pjesë në gjuhën shqipe dhe në dy pjesë në gjuhën maqedonase. Megjithatë, përfaqësuesit e studentëve e kanë vlerësuar këtë hap si një sukses të pjesshëm, duke vijuar këmbënguljen e tyre që i gjithë procesi i provimit të zhvillohet ekskluzivisht në gjuhën shqipe. Kjo formulë u prezantua gjatë takimit zyrtar të zhvilluar sot mes dikasterit të drejtësisë dhe studentëve. Pavarësisht marrëveshjes së arritur për ndarjen aktuale, studentët insistojnë në plotësimin e plotë të kërkesës së tyre fillestare. “Kjo që u arrit me një fjalë sot ishte, do ta kushtëzoja dhe do t’i thoja si një fitore e Lëvizjes Studentore dhe gjithë atyre që kanë dalë. Nga një zgjidhje gjysmake që u ofrua në fillim, u ofrua një zgjidhje prej 12 provimeve në gjuhën shqipe dhe dy në gjuhën maqedonase”, deklaroi Mevlan Ademi. Në përfundim të takimit, ministri i Drejtësisë, Jeton Shasivari, bëri të ditur se kjo çështje do t'i dërgohet për shqyrtim njërit prej institucioneve më të rëndësishme evropiane për çështje juridike. “Parashikojmë të kërkojmë edhe një mendim në afat të shkurtë nga Komisioni i Venecias si organi më prestigjioz, këshillëdhënës evropian për çështje kushtetuese dhe juridike”, u shpreh Jeton Shasivari, ministër i Drejtësisë i RMV-së. Kujtojmë se ky zhvillim vjen pas një serie protestash të organizuara nga studentët në qytetin e Shkupit, të cilët kanë kërkuar vazhdimisht të drejtën e tyre ligjore për ta dhënë provimin e jurisprudencës në gjuhën shqipe.