Lufta e ftohtë në futbollin spanjoll: Javier Tebas rrezikon shkarkimin pas konfliktit me Real Madridin

Krerët e La Ligës mund të përfshihen në një krizë të paprecedentë institucionale, pasi presidenti Javier Tebas rrezikon seriozisht pezullimin nga funksioni i tij pas përplasjeve të njëpasnjëshme me klubin e Real Madridit, raportojnë burimet mediatike nga Spanja. Tensioni aktual ndodhet në tryezën e departamentit juridik të Këshillit të Lartë të Sportit (CSD). Ky dikaster pritet të vendosë nëse do të dërgojë një kallëzim zyrtar në Tribunalin Administrativ të Sportit (TAD), organ ky që do të vlerësojë nëse ekzistojnë elementet e mjaftueshme ligjore për ta hequr kreun e La Ligës nga ushtrimi i detyrës. Fërkimi i fundit diplomatik dhe institucional nisi kur Javier Tebas guxoi të bënte një paralelizëm polemizues mes propagandës së regjimit nazist të udhëhequr nga Joseph Goebbels dhe linjës editoriale që ndjek Real Madrid TV, televizioni zyrtar i klubit madrilen. Një deklaratë e tillë solli menjëherë një kundërpërgjigje të ashpër nga gjiganti mbretëror. Drejtuesit e Real Madridit lëshuan një komunikatë zyrtare ku kërkuan pa hezitim largimin e menjëhershëm të Tebasit nga kryesimi i futbollit elitar spanjoll. Nëse ky proces disiplinor avancon deri në shkarkimin e tij, kjo do t'i jepte fitoren e parë të madhe Real Madridit në betejën e tyre afatgjatë kundër tij, një rivalitet dhe tension institucional që ka shoqëruar të gjithë periudhën e drejtimit të Tebasit që prej marrjes së kësaj detyre në vitin 2013.