Ngjarje e rëndë në Australi: Deputetja lufton për jetën pas sulmit të qëllimshëm me veturë, kryeministri zbulon prapaskenat

Deputetja e pavarur federale e Australisë, Helen Haines, gjendet në gjendje kritike për jetën në spital, pasi u godit qëllimisht nga një automjet jashtë zyrave të saj elektorale në qytetin Wangaratta të shtetit të Viktorias. Kryeministri australian, Anthony Albanese, ka dalë me një deklaratë zyrtare duke konfirmuar se përplasja nuk ka qenë aspak një aksident trafiku, por një sulm i drejtpërdrejtë ndaj ligjvënëses. Për shkak të natyrës së ngjarjes, në hetime janë përfshirë menjëherë njësitë speciale kundër terrorizmit dhe Agjencia Australiane e Inteligjencës së Sigurisë (ASIO). Incidenti i rëndë ka ndodhur të hënën, pak pas orës 15:30, në rrugën "Murphy Street". Forca të shumta policore kanë rrethuar perimetrin, duke e shpallur zonën vendngjarje krimi. Sipas dëshmitarëve okularë, 65-vjeçarja po paketonte disa sende nga bagazhi i makinës së saj, kur u përplas brutalisht nga një automjet i bardhë tip Land Rover. Autoritetet hetimore dhe dëshmitarët tregojnë se drejtuesi i mjetit fillimisht ka kaluar pranë deputetes, ka bërë një kthesë të menjëhershme dhe është vënë në drejtim të saj, duke e goditur dhe duke e lënë të bllokuar poshtë rrotave. Haines, nënë e tre fëmijëve, ka pësuar dëmtime të rënda trupore në pjesën e poshtme, ndërsa autoritetet e Viktorias po vlerësojnë mundësinë e transportimit të saj me helikopter drejt Melburnit për ndërhyrje më të specializuara mjekësore. Ndërkohë, raportimet fillestare mediatike sugjerojnë se ajo rrezikon të humbasë njërën gjymtyrë, edhe pse ky informacion ende nuk ka marrë një konfirmim zyrtar. Gjatë një konference për media të mbajtur të hënën në mbrëmje, kryeministri Albanese dha detaje shtesë mbi ngjarjen dhe konfirmoi se një person tashmë është vënë në pranga. “Një hetim i gjerë policor është duke u zhvilluar dhe mund të konfirmoj se një i dyshuar ndodhet në paraburgim”, u shpreh ai. Kreu i qeverisë shtoi se Policia Federale Australiane, ajo e Viktorias dhe ASIO po bashkërendojnë ngushtësisht veprimet e tyre. “Ekipi i Përbashkët Kundër Terrorizmit është aktivizuar, mirëpo motivi i këtij akti mbetet ende i paqartë”, theksoi Albanese, i cili konfirmoi gjithashtu se ka zhvilluar biseda telefonike me kryeministrin e Viktorias, Ben Carroll, dhe komisionerin e Policisë Federale, Reece Kershaw. Autoritetet policore bënë të ditur se i dyshuari 43-vjeçar do t'i nënshtrohet pyetjeve hetimore në stacionin e policisë në Wangaratta. Dëshmitë e mbledhura nga terreni, përfshirë atë të një berberi lokal i cili ndërhyri duke e nxjerrë shoferin nga automjeti dhe duke e neutralizuar pasi iu gjet një thikë e palosshme në xhep, po shqyrtohen me vëmendje nga hetuesit. Pavarësisht frikës dhe tronditjes, policia ka bërë thirrje për qetësi, duke siguruar qytetarët se bëhet fjalë për një incident të izoluar dhe se nuk ka ndonjë rrezik tjetër aktiv për komunitetin. Duke folur për figurën e saj, kryeministri Albanese e cilësoi Helen Haines si një personalitet me integritet të lartë dhe të respektuar gjerësisht në mjedisin parlamentar dhe shoqëror. “Helen është një grua jashtëzakonisht e zgjuar, por mbi të gjitha është një njeri i ndershëm, me integritet të papërlyer dhe që gzon respektin e të gjithë kolegëve në Parlament dhe kujtdo që ka pasur fatin të bashkëpunojë me të”, deklaroi ai. Nga ana e tyre, familjarët e deputetes lëshuan një deklaratë publike mbrëmjen e së hënës, ku shprehën mirënjohjen e thellë për qytetarët që ndërhynë në ndihmë të saj, si dhe për efektivët e policisë dhe stafin mjekësor. “Familja dhe stafi ynë nuk do të japin prononcime të tjera në këtë fazë dhe kërkojnë që të respektohet rreptësisht privatësia jonë nga ana e mediave dhe publikut”, thuhet në njoftim. Në lidhje me ngjarjen, ministri i Punëve të Brendshme, Tony Burke, solli në vëmendje statistikat shqetësuese, sipas të cilave gjatë vitit 2024 janë regjistruar 951 raste kërcënimesh dhe ngacmimesh ndaj zyrtarëve të lartë shtetërorë, shifër kjo që u ngjit në 1.067 gjatë vitit të fundit financiar.