Bilanci zyrtar pas protestës: 36 persona kërkuar ndihmë mjekësore, mes tyre efektivë, protestues dhe gazetarë

Ministria e Shëndetësisë ka publikuar shifrat e përditësuara lidhur me qytetarët dhe punonjësit e rendit që kanë pësuar lëndime gjatë protestës së zhvilluar një ditë më parë. Sipas të dhënave zyrtare, Spitali Universitar i Traumës ka pritur gjatë ditës së djeshme 31 persona që kanë kërkuar asistencë mjekësore. Në këtë shifër përfshihen 21 efektivë policie, 5 protestues, 4 kalimtarë të rastit si dhe 1 punonjëse e medias, e cila vijon të mbahet e shtruar. Aktualisht, në ambientet e Spitalit Universitar të Traumës ndodhen edhe 2 protestues të tjerë, të cilët po i nënshtrohen ekzaminimeve dhe konsultave mjekësore. Ndërkaq, duke nisur nga data 13 tetor, numri i përgjithshëm i të shtruarve që vazhdojnë të marrin trajtimin e nevojshëm ka shkuar në 14 pacientë, konkretisht: 5 efektivë policie, 4 protestues, 4 kalimtarë dhe 1 përfaqësuese e medias. Autoritetet shëndetësore konfirmojnë se gjendja e tyre shëndetësore paraqitet e qëndrueshme dhe e mirë. Nga ana tjetër, edhe Qendra Spitalore Universitare “Nënë Tereza” ka raportuar për trajtimin e 5 rasteve të lënduara gjatë ditës së djeshme, ku bëhet fjalë për 2 efektivë të policisë dhe 3 protestues.