Kërcënim me bombë në Kuvendin e Shqipërisë: Zbardhet përmbajtja e mesazhit alarmant

Institucioni i Kryesisë së Kuvendit të Shqipërisë është bërë shënjestër e një kërcënimi serioz për sulm me eksploziv, pasi në adresën zyrtare elektronike ka mbërritur një mesazh paralajmërues për praninë e një mjeti shpërthyes në këto ambiente. Pas marrjes së këtij alarmi, strukturat kompetente shtetërore janë vënë menjëherë në lëvizje, ndërkohë që në terren pritet ndërhyrja e forcave të specializuara të njësisë antieksploziv për të kryer kontrollet e nevojshme të sigurisë. Sipas informacioneve paraprake, në tekstin e e-mailit dërguesit kanë paralajmëruar një shpërthim të afërt, duke përdorur gjuhë kërcënuese dhe duke theksuar se situata do të jetë tejet e rëndë brenda godinës. Në mesazhin shqetësues, i cili shoqërohet edhe me simbole iraniane, thuhet: “Ju njoftojmë urgjentisht se në këtë moment brenda ndërtesës është vendosur një mjet shpërthyes që përmban nitrat amoni (ANFO). Sot, me lejen e Allahut, do të kryejmë një seri sulmesh terroriste të planifikuara në territorin e vendit. Ajo që do të përjetoni sot është vetëm fillimi. Një ditë, qeveria juaj do të dorëzojë pushtetin dhe do të vendoset Sheriati”.