Tronditja në Vlorë, nis hetimi për eksplozivin në makinën e administratorit: Nuk kam hasur kurrë konflikte

Autoritetet policore në Vlorë kanë nisur hetimet zyrtare lidhur me ngjarjen e ndodhur në orët e para të mëngjesit, ku një automjet është dëmtuar nga një shpërthim me lëndë plasëse. Mjeti në fjalë rezulton të jetë në pronësi të administratorit të Njësisë Administrative Shushicë dhe ka qenë i parkuar pranë murit rrethues të banesës së tij në fshatin Llakatund. Grupi hetimor ka sekuestruar menjëherë pamjet e regjistruara nga kamerat e sigurisë të instaluara në banesë, të cilat pritet të hedhin dritë mbi dinamikën e ngjarjes. Ndonëse pista kryesore e deritanishme lidhet me funksionin dhe detyrën zyrtare që ushtron funksionari, ky i fundit është marrë në pyetje nga uniformat blu, ku ka deklaruar se nuk ka qenë pjesë e asnjë konflikti apo mosmarrëveshjeje me persona të tjerë. Nga pamjet e siguruara në vendin e ngjarjes, automjeti i markës “Volkswagen Tiguan”, i ngjyrës së zezë, shihet i dëmtuar dhe i mbuluar me plasmas jashtë oborrit të shtëpisë. Fatmirësisht, nga incidenti janë shënuar vetëm dëme materiale në mjet, ndërsa nuk raportohet për persona të lënduar. Sipas të dhënave paraprake nga ekspertiza, sasia e tritolit e përdorur ka qenë e vogël, çka forcon dyshimet se qëllimi i autorëve mund të ketë qenë thjesht frikësimi ose dërgimi i një mesazhi paralajmërues ndaj zyrtarit. Ndërkohë, strukturat hetimore vijojnë pandërprerje veprimet operative dhe procedurale për zbardhjen e plotë të rrethanave, identifikimin dhe kapjen e autorëve të kësaj ngjarjeje.