Valë e re dhune dhe trazirash në Francë: Marine Le Pen lëshon alarmin për demokracinë dhe vë në shënjestër Macronin

Franca gjendet sërish nën pushtetin e tensioneve dhe përleshjeve të dhunshme, ndërsa figurat kryesore të opozitës kanë ngritur alarmin për gjendjen e sigurisë. Liderja e ekstremit të djathtë, Marine Le Pen, ka paralajmëruar se vendi po përballet me një rrezik serioz për rendin demokratik, duke ia faturuar përgjegjësinë presidentit Emmanuel Macron, të cilin e ka akuzuar për mungesë totale të autoritetit dhe besueshmërisë. Reagimi i kandidates për zgjedhjet presidenciale të vitit 2027 vjen menjëherë pas shpërthimit të akteve të dhunës dhe rifillimit të plaçkitjeve në rrugët e Parisit, duke tronditur sërish opinionin publik francez. “Po përjetojmë një krizë besimi”, u shpreh Le Pen, duke e cilësuar situatën aktuale si një “kërcënim ndaj demokracisë”, ndërsa vuri theksin te dështimet e ekzekutivit dhe ndikimin e së majtës ekstreme. Në të njëjtën linjë ka qenë edhe kreu i Tubimit Kombëtar (RN), Jordan Bardella, i cili gjatë një inspektimi në një stacion policor në kryeqytet, theksoi se siguria publike është shkatërruar plotësisht. “Sot në Francë nuk ekziston më rendi”, deklaroi Bardella, duke shtuar se gjatë fundjavës shteti francez ka përjetuar momente poshtërimi. Përshkallëzimi i dhunës në rrugët e Parisit ka detyruar strukturat e sigurisë të ndërhyjnë me urgjencë. Pas ditës kaotike, skena të reja përleshjesh u shënuan gjatë pasdites së të dielës, duke sjellë mobilizimin e njësive elitë të policisë. Për të dytën ditë me radhë, njësia e specializuar për ndërhyrje të shpejta urbane, CRS-8, është angazhuar në terren për të vënë nën kontroll situatën. Epiqendra e tensioneve u regjistrua në sheshin “Place de la République”, ku qindra protestues u përleshën me efektivët e rendit. Sipas Prefekturës së Policisë së Parisit, tubimi nuk kishte marrë lejen e duhur dhe ishte organizuar përmes thirrjeve në rrjetet sociale, të cilat nisën rreth orës 14:00 të pasdites së të dielës. Grupe individësh të maskuar kanë shfrytëzuar situatën për të sulmuar pronat private dhe për të boshatisur dyqanet, ndërkohë që policia po lufton për të rikthyer qetësinë publike. Ndërkohë, autoritetet kanë bërë publike shifra alarmante për ngjarjet e një dite më parë. Prefektura e Bouches-du-Rhône ka njoftuar se vetëm gjatë së shtunës, në qytetin e Marsejës, mbi 30 mijë persona janë përfshirë në akte plaçkitjeje. Ky numër i jashtëzakonshëm ka habitur ekspertët e sigurisë dhe drejtësisë, ndërsa vazhdimësia e trazirave në qendrat kryesore franceze ka shtuar frikën se autoritetet mund të humbasin kontrollin mbi rendin publik.