Egnatia mposht Vllazninë dhe ndez garën për titull, rrogozhinasit afrohen vetëm një pikë larg kreut

Egnatia karegjistruar një fitore të rëndësishme në shtëpi kundër Vllaznisë, në takimin e vlefshëm për javën e 7-të të kampionatit “Abissnet Superiore”. Dueli i zhvilluar në stadiumin e Rrogozhinës u mbyll me rezultatin 3-1 në favor të skuadrës vendase. Futbollisti Albanese ka zhbllokuar shifrat që në minutën e 9-të përmes një ekzekutimi të saktë nga pika e bardhë e penalltisë, ndërsa në minutën e 41-të ka qenë Adjessa ai që ka dyfishuar avantazhin në 2-0. Pjesa e dytë nisi me reagimin e shkodranëve, ku Perez ngushtoi diferencën pas një aksioni të rrjedhshëm të ndërtuar nga Balaj. Gjatë pjesës së dytë, skuadra nga Shkodra pati disa mundësi të arta për të barazuar dhe për të përmbysur rezultatin, por i shpërdoroi ato. Siç ndodh rëndësomë në futboll, ndëshkimi erdhi në minutën e 86-të, kur lojtari i ardhur nga stoli, Gruda, vulosi fatin e sfidës ndaj ish-klubit të tij. Falë këtij suksesi, Egnatia arkivon tri pikë të arta dhe ngjitet në kuotën e afërt me Teutën kryesuese, duke e ngushtuar diferencën në vetëm një pikë dhe duke e bërë garën për titullin kampion tejet të paparashikueshme. Në krahun tjetër, Vllaznia vazhdon të përballet me vështirësi në këtë nisje sezoni. Kuqeblutë regjistrojnë një tjetër humbje dhe mbeten të pozicionuar në vendin e 9-të të renditjes, me vetëm 5 pikë të grumbulluara deri më tani.