Protesta në Tiranë: Tre të lënduar përfundojnë në Traumë, mes tyre një 15-vjeçar dhe një punonjëse e medias

Ministria e Shëndetësisë dhe Mirëqenies Sociale ka bërë të ditur se gjatë zhvillimit të protestës, tre persona kanë kërkuar ndihmë mjekësore dhe janë dërguar për trajtim në Spitalin Universitar të Traumës. Bëhet fjalë për një efektiv të policisë, një adoleshent 15-vjeçar dhe një gazetare. Sipas bilancit zyrtar të përditësuar deri në orën 16:00, institucioni shëndetësor konfirmoi se të lënduarit janë jashtë rrezikut për jetën dhe gjendja e tyre shëndetësore paraqitet e qëndrueshme. Autoritetet shëndetësore njoftuan se tre të dëmtuarit po i nënshtrohen ekzaminimieve të nevojshme mjekësore dhe po marrin asistencën e duhur nga stafi i specializuar i këtij spitali. Gjatë këtij komunikimi, dikasteri i shëndetësisë ka përgënjeshtruar kategorikisht zërat dhe aludimet e përhapura në rrjet për navjoftimet rreth humbjes së jetës së një të mituri, duke i cilësuar ato si të pavërteta. “U bëjmë thirrje mediave dhe opinionit publik të tregojnë përgjegjësi në verifikimin dhe shpërndarjen e informacioneve, për të shmangur përhapjen e lajmeve të rreme që shkaktojnë panik, shqetësim te familjarët dhe tensione të panevojshme në opinionin publik”, thuhet në reagimin zyrtar.