Vazhdon kriza e Sunderlandit dhe Granit Xhakës, pësojnë humbjen e radhës në udhëtim

Kapiteni Granit Xhaka dhe skuadra e Sunderlandit nuk kanë arritur të marrin asnjë pikë nga udhëtimi te Bournemouthi, duke u mposhtur me rezultatin e pastër 2:0. Për vendasit e Bournemouthit kjo ishte fitorja e parë për këtë edicion garues, ndërkohë që Sunderlandi regjistroi disfatën e katërt radhazi në kampionat. Ecuria e ndeshjes u kushtëzua ndjeshëm që në pjesën e parë, pasi skuadra e Xhakës u detyrua të luajë me një futbollist më pak në fushë për pjesën më të madhe të takimit. Vendasit zhbllokuan shifrat qysh në minutën e 6-të. Evanilson dhuroi një harkim perfekt në zonë për Marcus Tavernier, i cili me kokë e dërgoi topin lehtësisht në rrjetën e pambrojtur. Situata u komplikua edhe më shumë për ekipin e drejtuar nga kapiteni Granit Xhaka në minutën e 17-të. Pas një ndërhyrjeje të palejuar ndaj lojtarit kundërshtar, Kevin Danso u ndëshkua me karton të kuq nga arbitri kryesor, duke e lënë Sunderlandin në inferioritet numerik. Porsa kishte nisur fraksioni i dytë i lojës, saktësisht në minutën e 48-të, Bournemouthi përfitoi nga një gabim trashanik në mbrojtjen kundërshtare për të dyfishuar epërsinë. Evanilson rrëmbeu topin, depërtoi rrezikshëm dhe mposhti portierin për të vulosur rezultatin përfundimtar 2:0. Pas përfundimit të javës së shtatë në Premier League, Bournemouthi ngjitet në vendin e 15-të me gjithsej gjashtë pikë, kurse Sunderlandi zbret në pozitën e parafundit, përkatësisht në vendin e 19-të, duke mbetur me katër pikë në konton e tij.