Nderim për heroin Idriz Rrecaj: Bedri Hamza dhe delegacioni i PDK-së vizitojnë familjen e tij

Kryetari i Partisë Demokratike të Kosovës, Bedri Hamza, i shoqëruar nga strukturat e partisë, ka zhvilluar një vizitë ngushëllimi në familjen e dëshmorit dhe heroit të vendit, Idriz Rrecaj. Lajmi u bë i ditur përmes një njofimi zyrtar nga deputeti Arian Tahiri, i cili theksoi se gjatë këtij takimi është shprehur respekti i thellë dhe mirënjohja shtetërore e qytetare për jetën, veprën dhe kontributin e jashtëzakonshëm të Rrecajt në shërbim të lirisë së Kosovës. "Pas 27 vitesh pritjeje dhe dhimbjeje, familja Rrecaj më në fund ka një vend ku mund të nderojë më të dashurin e saj. Idriz Rrecaj do të mbetet përherë simbol i qëndresës, përkushtimit dhe sakrificës për atdheun", u shpreh ndër të tjera Tahiri në mesazhin e tij përkujtimor.