Të shtëna me armë në Saraj, plagoset një person brenda automjetit të tij

Një incident i armatosur ka tronditur zonën e Sarajit në Shkup, ku si pasojë e të shtënave ka mbetur i plagosur një qytetar. Sipas informacioneve zyrtare nga Ministria e Punëve të Brendshme, rasti është denoncuar nga vetë viktima, e cila është identifikuar me inicialet M.I. Ai ka lajmëruar se është bërë shënjestër e një sulmi me armë zjarri ndërsa ndodhej brenda automjetit të tij. Në njoftimin e policisë theksohet se më 18.10.2026, rreth orës 09:50, në SPB Shkup është paraqitur M.I., i cili ka deklaruar se rreth orës 09:30, afër një marketi në fshatin Saraj, derisa ishte duke qëndruar në një veturë të tipit “Touran”, një person i panjohur ka hapur zjarr në drejtim të tij. Menjëherë pas alarmimit, patrudhat policore të SPB Shkup kanë dalë në vendin e ngjarjes, ku gjatë kontrollit kanë zbuluar dhe sekuestruar katër gëzhoja pistolete. Si pasojë e thyerjes së xhamit të automjetit nga plumbat, M.I. ka pësuar lëndime në dorë dhe në vendngjarje është thirrur menjëherë ekipi i Ndihmës së Shpejtë Mjekësore. Autoritetet e rendit bëjnë të ditur se hetimet janë duke vazhduar intensivisht për të zbardhur plotësisht rrethanat e ngjarjes dhe për të kapur autorin e dyshuar.