Paraqitje për t'u harruar në Serie A, Mërgim Vojvoda pëson humbje të rëndë me Udinesen

Përfaqësuesi i Kosovës, Mërgim Vojvoda, ka kaluar një fundjavë zhgënjyese në elitën e futbollit italian, pasi Udinese u mposht bindshëm 3:0 në shtëpi nga Lecce, në kuadër të xhiros së shtatë të Serie A. Mbrojtësi i kombëtares dardane e nisi takimin nga minuta e parë dhe qëndroi në fushë përgjatë gjithë ndeshjes, megjithatë skuadra e tij nuk arriti të gjente ritmin për të bërë ballë kundërshtarit. Seria e golave u hap në minutën e 11-të. Pas një harkimi nga goditja e këndit, Kialonda Gaspar përfitoi në zonë dhe me një goditje të saktë me kokë zhbllokoi shifrat, duke kaluar mysafirët në epërsi 0:1. Presioni i Lecces solli edhe golin e dytë në minutën e 33-të. Konan Ndri realizoi në një mënyrë të pazakontë pas një tjetër harkimi nga këndi, duke e shtyrë topin në rrjetë me trupin e tij për ta çuar rezultatin në 0:2. Gjatë fraksionit të dytë, ekipi mysafir rriti sërish rrezikshmërinë. Në minutën e 84-t, Paco Esteban depërtoi rrezikshëm brenda zonës dhe goditi nga afër, por fati e shpëtoi Udinesen pasi topi u ndal te shtylla e djathtë. Megjithatë, rezistenca e vendësve u thye përfundimisht në minutën e 86-të, kur Jamil Siebert lëshoi një goditje të fuqishme dhe vulosi triumfin përfundimtar 0:3 në favor të Lecces. Pas këtij rezultati negativ, Lecce ngjitet në vendin e 11-të të renditjes tabelore me nëntë pikë të grumbulluara, ndërsa Udinese vazhdon të mbetet në zonën e rrezikut, respektivisht në pozitën e 18-të me vetëm katër pikë në llogarinë e saj.