Mbështetje e plotë nga BSPSH për studentët, Gëzim Kalaja: Policia të ndalë dhunën, të gjithë në mbrojtje të rinisë

Bashkimi i Sindikatave të Pavarura të Shqipërisë (BSPSH) ka shprehur solidaritetin dhe mbështetjen e pakushtëzuar për protestat masive të studentëve dhe rinisë shqiptare. Kreu i kësaj sindikate, Gëzim Kalaja, ka kërkuar nga strukturat e rendit që të ndalojnë menjëherë përdorimin e dhunës dhe të mos shndërrohen në instrument të pushtetit. Në një deklaratë publike, Kalaja i ka cilësuar protestat e deritanishme si një këmbanë alarmi ndaj qeverisjes, e cila sipas tij nuk po kursen dhunën ndaj të rinjve që kërkojnë arsim cilësor dhe një jetë më të mirë për veten dhe familjet e tyre. Ai theksoi se energjia e rinisë nuk mund të ndalet dhe u bëri thirrje qytetarëve shqiptarë që të ngrihen në mbrojtje të fëmijëve të tyre. Kreu i BSPSH-së përsëriti thirrjen drejtuar forcave policore që të mos ushtrojnë forcë ndaj djemve dhe vajzave të vendit dhe të mos bëhen vegël e një pushteti që, siç u shpreh ai, po i detyron të rinjtë të braktisin vendin përmes emigracionit. Duke rikonfirmuar qëndrimin e sindikatës, Kalaja garantoi se BSPSH do të qëndrojë në krah të studentëve deri në arritjen e qëllimeve të tyre.