Nisje flakë për Tedi Carën në Ukrainë, sulmuesi kuqezi shënon pas vetëm shtatë minutash lojë

Vetëm shtatë minuta lojë i janë dashur sulmuesit shqiptar, Tedi Cara, për të lënë gjurmë me fanellën e skuadrës së tij të re, LNZ Cherkasy, në sfidën ndaj Kryvbas të vlefshme për javën e nëntë të elitës së futbollit ukrainas. Ish-lojtari i Partizanit ka shfrytëzuar në mënyrën më të mirë të mundshme një asistim të marrë brenda zonës kundërshtare, duke konfirmuar instinktin e tij prej goleadori. Me një lëvizje inteligjente, Cara ka lexuar mjaft mirë hapësirën e lënë të lirë nga mbrojtja kundërshtare, duke e dërguar topin në rrjetë dhe duke treguar menjëherë vlerat e tij në kampionatin ukrainas. Gjatë karrierës së tij, sulmuesi ka regjistruar sukseset më të rëndësishme në karrierë pikërisht me fanellën e Partizanit, ku u shpall kampion i Shqipërisë në sezonin 2022-2023, ndërsa më pas fitoi edhe Superkupën e vendit në edicionin 2023-2024.