Tentativa për kontrabandim me migrantë: Zbardhet rasti në Han të Elezit dhe vihet në pranga drejtuesi i kamionit

Një operacion i sukseshëm i Policisë së Kosovës në pikën kufitare të Hanit të Elezit ka rezultuar me zbulimin e dy personave që po udhëtonin të fshehur brenda rimorkios së një mjeti të rëndë transporti, i cili kishte hyrë në territorin e vendit tonë nga Maqedonia e Veriut. Sipas informacioneve zyrtare nga autoritetet policore, ngjarja është regjistruar gjatë ditës së djeshme, konkretisht rreth orës 14:50, kur kamioni i markës “Mercedes” me targa vendore, i drejtuar nga një shtetas kosovar, është paraqitur për kalim kufiri. Pas përfundimit të procedurave hyrëse, automjeti është drejtuar drejt terminalit doganor për kontrolle të detajuara. Gjatë inspektimeve të ushtruara në pjesën e rimorkios, efektivët kanë lokalizuar dy meshkuj të fshehur, të cilët nuk posedonin asnjë lloj dokumentacioni identifikues, ndërsa në deklarimet e tyre paraprake kanë pretenduar se janë shtetas të huaj. Me vendim të prokurorit kompetent, personat e përfshirë në këtë ngjarje janë shoqëruar për në ambientet policore për t'u marrë në pyetje, dhe pas përfundimit të veprimeve hetimore preliminare janë liruar në procedurë të rregullt. Drejtësia tashmë e ka kualifikuar zyrtarisht këtë ngjarje penale si vepër e “kontrabandimit me migrantë”, ndërkohë që hetimet vijojnë për të zbardhur rrethanat e plota të ngjarjes.