Krizë humanitare në Oleshky: Uria dhe mungesa e ilaçeve rrezikojnë jetën e qytetarëve

Ministri i Jashtëm i Ukrainës, Andrii Sybiha, ka ngritur alarmin se ushtria ruse po e katandis qytetin ukrainas të Oleshkyt në një “kurth vdekjeje” të mbërthyer nga uria ekstreme, ndërkohë që u ka bërë thirrje instancave ndërkombëtare që të ndërvënë për të mundësuar evakuimin e popullsisë. Këto deklarata të forta vijnë vetëm një ditë pasi kreu i Kremlin, Vladimir Putin, gjatë një bisede me Papa Leonin, pati premtuar bashkëpunim për dërgimin e ndihmave elementare në këtë zonë të gjendur në rajonin jugor të Khersonit. Sipas shefit të diplomaciei ukrainase, trupat ruse po e izolojnë totalisht vendbanimin, ku spitali lokal ka shteruar çdo rezervë ilaçesh. Ai ka bërë të ditur gjithashtu se dhjetëra kufoma mbeten të braktisura nëpër rrugë dhe banesa, pasi autoritetet pushtuese nuk lejojnë familjarët t'i japin lamtumirën e fundit të vdekurve të tyre. Sybiha ka theksuar se familjet po përballen me një katastrofë urie, duke mbijetuar vetëm me mbetjet e perimeve në kopshte, ushqime të konservuara apo edhe kërmij. Përballë kësaj situate alarmante, Kievi kërkon sërish korridore të sigurta evakuimi dhe prani të menjëhershme humanitare ndërkombëtare, duke kërkuar që bota të mos hesht para kësaj tragjedie.