Tensione në Tiranë: Gjykata vulos fatin e 51 të ndaluarve gjatë protestave, 11 mbeten prapa grilave

Gjykata e Tiranës ka përfunduar seancën për caktimin e masave të sigurisë ndaj 51 personave të vënë në pranga gjatë incidenteve dhe përplasjeve të regjistruara në protestat e fundit në kryeqytet. Sipas vendimit të marrë nga trupi gjykatues, 11 prej protestuesve të arrestuar do të vuajnë masën “Arrest në burg”, ndërsa 40 të tjerë janë lënë të lirë nga paraburgimi, me kusht që të mos jenë subjekt i ndonjë hetimi tjetër penal. Nga totali i personave që kanë lënë qelitë, masat e sigurisë janë ndarë në disa kategori: 5 prej tyre janë vendosur në “Arrest në shtëpi”, ndërsa për 25 të tjerë është caktuar detyrimi për t’u paraqitur rregullisht pranë policisë gjyqësore. Gjithashtu, 10 persona janë ndëshkuar me masën e ndalimit dhe detyrimit të qëndrimit në një vend të caktuar. Kjo masë përfshin ndalimin e afrimit në një distancë prej 500 metrash pranë institucioneve shtetërore, si dhe ndalesën për të marrë pjesë në tubime apo sheshe publike pa marrë më parë leje nga gjykata. Të arrestuarit përballen me një sërë akuzash të rënda, ku përfshihen shkatërrimi i pronës publike dhe private, goditjet për shkak të detyrës, kundërshtimi i forcave të rendit, pengimi i qarkullimit rrugor dhe organizimi i tubimeve të paligjshme. Ndërkohë, ndaj një prej personave të mbyllur në qeli, konkretisht shtetasit R.D., prokuroria ka shtuar edhe akuzat për vjedhje dhe mbajtje pa leje të armëve të ftohta.