Tensionet në Tiranë: Protestuesit hedhin gurë e flakadanë në rrugën e Dibrës, policia përgjigjet me plumba gome

Situata në kryeqytet ka degjeneruar në përplasje të forta, ndërkohë që zona e rrugës së Dibrës në Tiranë është përfshirë nga një kaos i vërtetë. Kjo ka ndodhur pasi turma e protestuesve është zhvendosur atje, pas ndërhyrjes së forcave të rendit për t'i larguar nga bulevardi kryesor. Efektivët e policisë kanë ndjekur grupin e protestuesve edhe në këtë zonë alternative. Nga ana e tyre, protestuesit janë kundërpërgjigjur në mënyrë të dhunshme, duke sulmuar automjetet e forcave të rendit me gurë dhe flakadanë. Për të vendosur kontrollin dhe për të shpërndarë turmën, efektivët e policisë janë detyruar të përdorin kundërpërgjigje fizike, duke shtënë me plumba gome në drejtim të protestuesve.