Pendimi i Juventusit dhe Romës: Ylli që u la t'i ikte nga duart tani kushton sa një pasuri

Dy nga gjigantët e Serie A, Juventus dhe Roma, duket se janë penduar për mundësinë e humbur në të kaluarën, pasi tashmë po synojnë rikthimin në Itali të mesfushorit me origjinë nga Bregu i Fildishtë, Issa Doumbia. Lojtari, i cili ka vendosur të përfaqësojë ngjyrat e Italisë, u transferua verën e kaluar nga radhët e Venezias te Sporting Lisbona për shifrën e 20 milionë eurove. Brenda një periudhe shumë të shkurtër kohore, 23-vjeçari ka dëshmuar shkathtësinë e tij si mesfushor polivalent, duke u shndërruar në një shtyllë të rëndësishme për skemat e skuadrës portugeze. Falë paraqitjeve të tij mbresëlënëse, ai ka kapur menjëherë radarin e klubeve elitare, ku Biankonerët dhe verdhekuqtë e kryeqytetit italian kanë shfaqur një interesim konkret për shërbimet e tij. Megjithatë, marrja e lojtarit nuk do të jetë aspak e lehtë. Sipas burimeve mediatike portugeze, drejtuesit e Sporting Lisbonës kanë blinduar talentin e tyre duke i vendosur një klauzolë lirimi që kap shifrën e përafërt prej 80 milionë eurosh. Përveç interesit të shtuar nga Serie A, situata e mesfushorit po monitorohet me vëmendje edhe nga disa skuadra prestigjioze që militojnë në Premier League.