Valë protestash në Itali: Dhjetëra mijëra qytetarë kërkojnë paga më të larta, përleshje të dhunshme në Milano dhe Torino

Një valë e fuqishme protestash ka përfshirë Italinë, ku mbi njëqind organizata dhe shoqata i janë bashkuar thirrjes së Konfederatës së Përgjithshme Italiane të Punës për të marshuar në Romë. Ndërkohë, në qytete të tjera të vendit, revoltë kundër shtrenjtimit të jetesës është shoqëruar me incidente, përleshje fizike me forcat e rendit, të lënduar dhe disa arrestime. Nën thirrjen unifikuese “Punë, paqe, mjedis, mirëqenie, Kushtetuta”, turma të mëdha njerëzish pushtuan bulevardet e kryeqytetit për të adresuar shqetësimet e tyre për të ardhurat e ulëta, pasigurinë në vendet e punës, degradimin e shërbimeve publike dhe padrejtësitë në sistemin fiskal. Përballë kësaj fryme në Romë, situata në Milano dhe Torino ka degeneruar në përplasje të hapura mes demonstruesve dhe policisë, duke lënë pas pasojë persona të plagosur dhe të ndaluar nga autoritetet. Kjo demonstratë masive shënoi një rikthim të fuqishëm të Konfederatës së Përgjithshme Italiane të Punës në rrugët e Romës, e mbështetur nga një rrjet i gjerë prej më shumë se njëqind shoqatash, të cilat së bashku parashtruan një platformë të gjerë kërkesash socio-ekonomike. Nga ana tjetër, agjencia e lajmeve ANSA bën të ditur se shoqata e transportit rrugor të pasagjerëve, Anav Sicilia, ka lëshuar një alarm zyrtar se sektorit privat të transportit i kanoset rreziku i bllokimit total për shkak të mungesës së karburantit që nga dita e hënë. Paga më të larta dhe më shumë fonde për shëndetësinë Kërkesat e qytetarëve në sheshe u fokusuan te domosdoshmëria e rritjes së të ardhurave mujore, frenimi i punësimit të pasigurt, lehtësimi i qasjes në banim dhe mbrojtja e patjetërsueshme e sektorit publik. Organizatorët theksuan gjithashtu nevojën urgjente për një reformë të drejtë tatimore, e cila do të detyronte shtresat me të ardhura dhe pasuri të larta të japin kontributin e tyre real. Platforma e protestës kërkon prerazi goditjen e evazionit fiskal, uljen e ngarkesës së taksave mbi pagat dhe pensionet, si dhe vendosjen e taksave mbi fitimet e tepërta, të ardhurat kolosale dhe pasuritë e mëdha private. Lëvizja sindikale kërkoi gjithashtu që buxheti i shtetit të ndajë të paktën 7,5 për qind të Prodhimit të Brendshëm Bruto për shëndetësinë dhe 5 për qind për arsimin, me qëllim punësimin e stafeve të reja, shkurtimin e radhëve të gjata të pritjes në spitale dhe ofrimin e shërbimeve cilësore në çdo cep të vendit. Në axhendën e protestuesve u përfshinë edhe çështje kyçe si angazhimi për mbrojtjen e ambientit, ruajtja e paqes globale, kundërshtimi i militarizimit dhe rritjes së buxheteve për armatime, si dhe mbrojtja dhe respektimi i plotë i parimeve të Kushtetutës italiane. Tensione dhe përleshje të ashpra me policinë në Milano e Torino Pavarësisht se tubimi qendror u zhvillua në Romë, tensionet më të mëdha u regjistruan në Milano dhe Torino, ku situata doli jashtë kontrollit. Në zemër të Milionit, konkretisht në rrugën Via Broletto pranë Via San Tomaso, protestuesit e nisën marshimin “Italia in Piazza” – ku merrnin pjesë mbi pesë mijë veta – duke hedhur gurë në drejtim të kordonit policor. Sipas dëshmive nga terreni, drejt forcave të rendit u hodhën edhe lëndë piroteknike dhe fishekzjarrë, ndërkohë që për shkak të incidenteve dhe ndërhyrjeve, kolona e protestuesve u nda në dy pjesë. Skena dhune dhe përleshjesh u shënuan edhe në Torino, ku qytetarët dolën në sheshe për të shprehur mllefin ndaj kostos së lartë të jetesës, ndërsa burimet mediatike italiane konfirmuan praninë e të lënduarve dhe personave të arrestuar nga policia. Këto zhvillime tregojnë qartë pakënaqësinë e thellë dhe të akumuluar të një pjese të madhe të popullsisë ndaj politikave aktuale ekonomike, kostove të papërballueshme të jetesës, nivelit të pagave, taksave dhe mënyrës se afrimit të shërbimeve publike në Itali.