“Respekto qytetarët!” Reagimi i ashpër i Arbana Osmanit ndaj kryeministrit Rama

Prezantuesja e njohur e ekranit, Arbana Osmani, ka thyer heshtjen përmes një reagimi publik në platformat sociale, duke i drejtuar një mesazh të prerë e kritik kreut të qeverisë, Edi Rama, në lidhje me tensionet politike dhe protestat e bujshme që kanë përfshirë Tiranën. Nëpërmjet një shkrimi të ndarë në rrjetin social Instagram, Osmani sqaroi se paraprakisht ka preferuar të ruajë heshtjen për të analizuar situatën, duke nënvizuar se ngjarjet aktuale në vend nuk duhet të trajtohen si një program argëtues televiziv apo si një mundësi për të fituar vëmendje virtuale. “Kam zgjedhur të hesht këto ditë, për të kuptuar më mirë se ç’po ndodh; sepse mendoj se ajo që po ndodh sot në Shqipëri nuk është një reality show që duhet komentuar me tifozllëk nga divani i shtëpisë, as një mundësi për t’u shfaqur populiste me statuse për më shumë ‘likes’ në Instagram. Duhet kuptuar, për të reaguar,” ka shkruar ajo në mesazhin e saj. Duke u pozicionuar si nënë e tre fëmijëve, moderatorja e njohur shprehu keqardhjen e saj të thellë për skenat e dhunës ndaj të rinjve që protestojnë për të drejtat e tyre, si dhe për dëmet e shkaktuara në infrastrukturën e kryeqytetit gjatë këtyre dekadave të tranzicionit. “Si një nënë e 3 fëmijëve, më dhëmb të shoh të rinjtë e pashpresë, disa prej tyre në moshën e djalit tim, të rrihen dhe lëndohen duke marrë dhunën si të vetmen përgjigje për kërkesat e tyre legjitime, ashtu siç më dhëmb të shoh Tiranën të digjet për të satën herë në këto 30 vite. Unë nuk kam besuar dhe nuk besoj kurrë se dhuna është zgjidhja. Këtë e mendoj qoftë për ata policët që tentojnë të shpërndajnë turmat me shkopinj gome, qoftë për ata që shkatërrojnë institucione e biznese që iu përkasin të gjithëve, qoftë dhe për plot miq e mikesha të Instagramit që me statuset e tyre populiste justifikojnë dhunën,” shton ajo më tej. Në fund të deklaratës së saj publike, Arbana Osmani i ka bërë thirrje urgjente kryeministrit që të heqë dorë nga shpërfillja dhe të tregojë vëmendje ndaj kërkesave të qytetarëve. “Por si qytetare e këtij vendi ku kam vendosur të rris fëmijët e mi, sot më shumë se kurrë ndjej t’i them me zë të lartë kryeministrit: ‘Mjaft; respekto popullin tënd, dëgjoje.’ Askush nuk e meriton këtë,” përmbyll ajo reagimin e saj.