Karoglan zyrtarizohet te Partizani: Zbulova një klub me potencial të jashtëzakonshëm dhe infrastrukturë moderne

Mislav Karoglan është prezantuar zyrtarisht para medieve në konferencën e tij të parë për shtyp si trajneri më i ri i skuadrës së Partizanit. Tekniku kroat ka dalë para gazetarëve në prag të sfidës transfertë kundër Vorës, e cila do të luhet ditën e nesërme, duke iu përgjigjur pyetjeve rreth projektit dhe pritshmërive të tij me të kuqtë. I pyetur se çfarë e shtyu të pranonte ofertën e kryeqytetasve, Karoglan theksohet se Partizani mbetet një prej emrave më të rëndësishëm në futbollin shqiptar. Ai vlerësoi kushtet e punës dhe kompleksin sportiv që pritet të inaugurohet së shpejti, ndërsa tregoi se ka konsultuar një koleg kroat me eksperiencë të mëparshme në këtë klub. Sipas tij, bëhet fjalë për një organizim model në çdo drejtim dhe se i pëlqejnë sfidat për ta ngjitur skuadrën në majat që i takojnë. Ai shtoi se kjo përbën një eksperiencë të re, ndryshe nga karriera e tij e mëparshme ku ka luftuar për kompeticionet evropiane, ndërsa tani fokusi kryesor është largimi i shpejtë nga zona e rrezikut në tabelë. Lidhur me njerëzit që ndikuan në këtë transferim, trajneri zbuloi se roli kryesor i takon menaxherit të tij dhe ish-trajnerit Zoran Zekic, i cili i dha referenca pozitive pas eksperiencës së tij të suksesshme në kryeqytet. Karoglan pranoi se i pëlqen presioni i skuadrave të mëdha, ndjesi që e ka përjetuar edhe te Hajduku apo Sheriff Tiraspoli, duke e parë tashmë Partizanin si një ambient me perspektivë të madhe. Sa i përket objektivave kontraguale dhe Evropës, ai sqaroi se nuk ka pasur ende biseda konkrete për shifra apo synime përfundimtare, pasi prioritet mbetet ndërhyrja dhe përmirësimi i menjëhershëm në çdo aspekt, duke premtuar angazhim maksimal. Në fund, duke analizuar ndeshjen e nesërme kundër Vorës, kroati u tregua i kujdesshëm duke theksuar se çdo takim ka peshën e vet dhe se vëmendja është e përqendruar vetëm te ky duel. Ai e cilësoi Vorën si një kundërshtar solid, me elementë cilësorë në përbërje, por konfirmoi se skuadra e tij ka studiuar çdo detaj për të synuar suksesin në këtë transfertë.