Ish-ushtaraku Hafir Hoxha ashpër ndaj Policisë së Shtetit: Dështime dhe mungesë e theksuar profesionalizmi në trajtimin e protestave

Ish-ushtaraku Hafir Hoxha ka adresa kritika të rënda në drejtim të Policisë Shqiptare, duke vënë në pikëpyetje nivelin e përgatitjes dhe mënyrën se si po menaxhohen tubimet dhe protestat publike. Sipas tij, ndonëse formimi bazë për patrullat e përgjithshme zgjat një vit akademik, teoria dhe shkollimi formal mbeten të pamjaftueshëm pa zotërimin e aftësive praktike, disiplinës së rreptë dhe komandimit të mirëfilltë profesional. Duke analizuar pamjet e transmetuara në media nga protestat e fundit, Hoxha thekson se vihen re shqetësime reale sa i përket përdorimit të forcës, taktikave të operimit dhe reagimit në situata emergjente. Ai vlerëson se një strukturë e rendit publik me standarde duhet të dëshmojë aftësi konkrete në terren. Sipas tij, policia ka për detyrë të aplikojë forcën në mënyrë strikt të nevojshme, proporcionale dhe ligjore, duke shmangur dhunën ndaj qytetarëve paqësorë që nuk bëjnë rezistencë, dukuri kjo që sipas tij fatkeqësisht po përsëritet. Po ashtu, mbrojtja e objekteve strategjike dhe institucioneve kërkon planifikim dhe pozicionim më efikas të forcave e barierave mbrojtëse, elementë ku ai vëren mangësi në praktikë. Në radhën e detyrave të një force moderne rendit, Hoxha veçon menaxhimin e turmave, ndarjen e qartë të protestuesve paqësorë nga ata të dhunshëm, si dhe parandalimin e përshkallëzimit të situatave. Ai kërkon organizim më të mirë të qarkullimit rrugor, krijim të korridoreve të sigurta dhe prani të ekipeve të posaçme për pastrimin e rrugëve nga mjetet e forta, gurët apo betoni, për të mos lejuar përdorimin e tyre kundër rendit apo qytetarëve. Eksperti thekson se suksesi i një operacioni nuk varet nga numri i lartë i efektivëve të dislokuar në terren, por nga mënyra e organizimit, udhëheqjes, pajisja me mjetet e duhura dhe reagimi nën presion, duke shtuar se deri tani efektivëve u mungojnë pajisjet adekuate. Duke mos toleruar as dhunën e protestuesve dhe as tejkalimin e autoritetit nga ana e efektivëve, ai kujton se misioni kryesor i uniformave blu është garantimi i rendit, sigurisë publike dhe respektimi i të drejtave kushtetuese, duke shmangur dhunën e panevojshme që shfaqet shpesh në terren. Në fund, Hafir Hoxha bën thirrje që institucionet kompetente të ndërmarrin një analizë objektive të ndërhyrjeve policore, të hetojnë rastet e mundshme të përdorimit të dhunës së tepruar dhe të vlerësojnë strukturën e komandimit e pajisjet në përdorim. Për më tepër, ai ngre si shqetësim mungesën e një komunikimi të rregullt dhe institucional mes policisë dhe organizatorëve të protestave, duke përsëritur se efektiviteti i një policie moderne dëshmohet përmes vetëkontrollit dhe minimizimit të pasojave për qytetarët dhe pronën.