Kriza në Tiranë, analisti i njohur ndërkombëtar: Rama po përballet me provën më të vështirë në 13 vite pushtet

Eksperti i njohur i çështjeve evropiane, ish-analisti i BBC-së dhe i "The Economist Intelligence Unit", Gabriel Partos, ka analizuar situatën e tensionuar në Shqipëri, duke e cilësuar atë si sfidën më të madhe me të cilën po ballafaqohet kryeministri Edi Rama pas një dekade e gjysmë në krye të qeverisë. Në një intervistë dhënë gazetarit Muhamed Veliu, ai ka vlerësuar se kreu i ekzekutivit është kthyer në viktimë të suksesit të tij politik, veçanërisht pas sigurimit të mandatit të katërt. Sipas Partos, vala e protestave që ka përfshirë Tiranën dhe vendin gjatë pesë ditëve të fundit përbën një moment kthese dhe një vazhdimësi të lëvizjeve opozitare të njohura si “Revolucioni Flamingo”. Duke vënë në dukje përmasat dhe nivelin e dhunës të paprecedentë në historinë e afërt të vendit, ai thekson se këto zhvillime përfaqësojnë një rrezik real për stabilitetin e qeverisjes. Duke u ndalur te shkaqet e kësaj pakënaqësie masive, analisti ndërkombëtar shpjegon se pavarësisht progresit të arritur në disa fusha dhe synimeve për integrim evropian, qytetarët po përballen me vështirësi të mëdha. Ai veçon kostot e larta të arsimimit për studentët, vështirësitë ekonomike dhe pamundësinë për të ndërtuar një të ardhme në vend pas përfundimit të studimeve. Kjo situatë, sipas tij, po ushqen fenomenin e “rrjedhjes së trurit”, ku shtresa më e përgatitur e shoqërisë po largohet drejt vendeve të Bashkimit Evropian dhe më gjerë. Për më tepër, Partos e cilëson korrupsionin si një plagë kronike të shoqërisë shqiptare, e cila vijon të mbetet një shqetësim i madh, pavarësisht përpjekjeve të sistemit të drejtësisë për ta luftuar ndër vite. Sa i përket deklaratave të kryeministrit Edi Rama, i cili ka lënë të kuptohet se trazirat mund të jenë nxitur nga "duar të huaja", analisti britanik shprehet se faktorët e jashtëm nuk mund të merren si shkas për të shfajësuar problemet e brendshme. Ndonëse nuk e përjashton mundësinë e ndërhyrjeve të mundshme nga aktorë rajonalë apo ndërkombëtarë, siç ka ndodhur në raste të tjera në Evropë, ai këmbëngul se rrënja e protestave që shohim sot në Shqipëri nuk mund t'i vishet forcave të huaja.