Humbja e dytë radhazi e lëkund Dinamon, trajneri Daja: Asnjë alarm për titullin, ja ku çeduam

Dinamo ka regjistruar disfatën e dytë rresht në Kategorinë Superiore, pasi u mposht mbrëmjen e sotme nga Teuta e drejtuar nga Edlir Tetovë. Ky rezultat negativ bën që kryeqytetasit të humbasin sërish hapin ndaj skuadrave në krye të klasifikimit, duke ngritur pikëpyetje rreth ambicieve të tyre për trofeun kampion. Pas përfundimit të sfidës, trajneri i Dinamos, Ilir Daja, u shpreh për mediat se nuk ka vend për panik, pavarësisht ecurisë aktuale. Ai vlerësoi paraqitjen e skuadrës dhe theksoi se diferencën e bëri mungesa e saktësisë në metrat e fundit të fushës. "Nuk ka asnjë shqetësim, janë gjëra që ndodhin. Sot nuk kemi bërë keq. Nëse e shikojmë ndeshjen nga fillimi deri në fund, na ka munguar pasimi i fundit. Ky është futbolli", u shpreh tekniku i Dinamos. Më tej, Daja përmendi mungesat e rëndësishme në organikë si faktor ndikues në lojën e skuadrës, duke veçuar mungesën e kapitenit Dita dhe Sembene, të cilët do t'i kishin dhënë më shumë qetësi dhe dominim lojës në ajër. "Kemi një kontingjent lojtarësh jashtë, si kapiteni Dita. Ai i jep më shumë qetësi dhe forcë lojës sonë në ajër. Nëse do të ishte Dita në lojë apo Sembene, mund të kishim luajtur në një formë tjetër", shtoi ai. Tekniku analizoi gjithashtu zgjedhjet taktike ndaj kundërshtarit dhe theksoi domosdoshmërinë e përmirësimit të disa detajeve për sfidat e ardhshme, duke shprehur besim të plotë te grupi i lojtarëve dhe te puna që duhet bërë në repartin ofensiv.