Kriza e mbeturinave në kryeqytet: Ministrja Pacolli paralajmëron ndëshkime për institucionet përgjegjëse

Situata alarmante e krijuar me mbeturinat në qytetin e Prishtinës ka sjellë reagimin e menjëhershëm të autoriteteve qendrore. Ministrja e Mjedisit dhe Planifikimit Hapësinor, Fitore Pacolli, ka njoftuar se pas një inspektimi të jashtëzakonshëm të kryer nga Inspektorati i ministrisë që ajo drejton, janë shqiptuar gjoba ndaj institucioneve që kanë dështuar në menaxhimin e kësaj situate. Nëpërmjet një njoftimi publik, Pacolli ka bërë të ditur se gjendja e konstatuar në terren është tejet e rëndë dhe përbën një rrezik të drejtpërdrejtë për shëndetin e qytetarëve. Sipas saj, mbajtja pastër e mjedisit dhe menaxhimi i mbeturinave përbëjnë një nga detyrat kryesore të pushtetit vendor, ndërsa ka kritika të ashpra në drejtim të Komunës së Prishtinës dhe ndërmarrjes përgjegjëse publike për shkak të tendencës për t'ia hedhur fajin njëra-tjetrës. Ministrja ka drejtuar gishtin edhe nga i pari i kryeqytetit, Përparim Rama, duke vlerësuar se ky dështim tregon qartë për çalime serioze në mbarëvajtjen e funksionimit lokal. Ajo ka qenë e prerë në qëndrimin e saj se mungesa e përgjegjësisë dhe neglizhenca nuk do të tolerohen më në dëm të qytetarëve. “Ligji do të zbatohet, ndërsa dështimi do t’u faturohet të gjithë atyre, pa dallim, që po rrezikojnë shëndetin e qytetarëve”, ka shkruar Pacolli, duke theksuar se çdo shkelës i detyrimeve ligjore do të përballet me pasojat institucionale.