Paralajmërimi bujshëm: Dy kryetarë komunash në rrezik arrestimi, përmendet emri i Faton Pecit

Analisti Dardan Krasniqi ka bërë një paralajmërim të bujshëm, duke deklaruar se së shpejti pritet të ketë zhvillime të reja në drejtësi, konkretisht arrestimin e dy krerëve të komunave në vend. Sipas tij, dy zyrtarët lokalë që janë në shënjestër të drejtësisë përballen tashmë me aktakuza të ngritura, ndërsa veçoi faktin se njëri prej tyre mban aktualisht postin e kryetarit të komunës, por më herët ka shërbyer edhe si ministër në kabinetin qeveritar. Duke folur rreth kësaj çështjeje, Krasniqi u shpreh se emrat e tyre janë përfolur gjatë në opinionin publik, duke lënë të kuptohet se qytetarët tashmë e dinë se për kë bëhet fjalë, ndërsa theksoi rëndësinë e mosndërhyrjes së politikës në proceset e drejtësisë. I pyetur drejtpërdrejt gjatë një paraqitjeje televizive në emisionin "Kosova Live" në T7 nëse zyrtarë të tillë si Faton Peci mund të jenë pjesë e këtij skenari për shkak të funksioneve të tij të kaluara dhe aktuale, Krasniqi nuk e ka përjashtuar një mundësi të tillë. Ai përfundoi duke theksuar se nëse një veprim i tillë nga ana e prokurorisë dështon të realizohet, kjo do të jetë pasojë e drejtpërdrejtë e ndikimit politik, pasi sipas tij, ndarja e pushteteve në Kosovë vazhdon të mbetet e brishtë.