Kosova bëhet gati për garën ekstreme: Vrapuesit do të sfidojnë kufijtë në ultramaratonën “Backyard Ultra”

Këtë të shtunë, më 17 tetor, fshati Miradi i Fushë Kosovës do të shndërrohet në arenën e një ngjarjeje të paprecedentë sportive. Për herë të parë në vendin tonë do të organizohet gara e njohur ndërkombëtarisht “Backyard Ultra”, një lloj ultramaratone ku atletët duhet të kalojnë një pistë prej 6.7 kilometrash brenda një afati prej 60 minutash. Sipas rregullave të këtij format unik, plotësimi i 24 xhirove nënkupton përshkimin e rreth 160 kilometrave, respektivisht 100 miljeve, brenda një harku kohor prej 24 orësh. Megjithatë, sfida nuk mbyllet domosdoshmërisht me kaq, pasi ajo vijon për aq kohë sa garuesit arrijnë të respektojnë afatin e orarit për çdo rreth të ri. Në këtë garë nuk triumfon vrapuesi më i shpejti, por ai që tregon qëndrueshmërinë më të madhe mendore dhe fizike. Në nisje të çdo ore të re, pjesëmarrësit duhet të rifillojnë pistën, derisa në fund të mbetet vetëm një garues, i cili duhet të kalojë i vetëm xhiron përfundimtare për të rrëmbyer trofeun. Nëse ky i fundit dështon, gara mbyllet pa asnjë fitues. Organizatori Bleron Rrustemi dhe garuesi ndihmës Dren Krasniqi kanë ndarë detajet rreth këtij koncepti të veçantë, sfidave dhe fazës përgatitore që ka paraprirë këtij organizimi. “Ne jemi duke e organizuar ultramaratonën e kategorisë ‘Backyard’, që njëkohësisht është një nga formatet më të reja të ultramaratonës në botë. Ka filluar të mbahet në vitin 2011 dhe qëllimi i saj është që brenda 24 orëve të përshkohen 100 milje, që i bie rreth 6.7 kilometra për çdo orë. Për këtë arsye, formati ‘Backyard Ultra’ është i tillë që çdo orë duhet t’i përfundosh 6.7 kilometrat, të kthehesh para se të përfundojë koha dhe të nisesh në orën tjetër. Realisht, këtë garë do ta cilësoja si një nga më të vështirat, për shkak se nuk ka një distancë ku mund të ndalesh ose ta dish se kur ke kohë të ndalesh. Gara për ty përfundon kur nuk mund të arrish në kohë ose nuk mund ta nisësh rrethin tjetër. Do të thosha se është një nga ultramaratonat më të vështira që mund ta bësh. Ultramaratona fillon më 17 tetor, në orën 07:00 të mëngjesit, dhe çdo orë do të rifillojë rrethi prej 6.7 kilometrash, derisa të mbetet vetëm një garues. Garuesi i fundit duhet ta përfundojë rrethin e fundit i vetëm. Nëse nuk arrin ta përfundojë, gara përfundon pa fitues”, ka shpjeguar Rrustemi. Krahas vështirësive teknike, interesimi i treguar nga qytetarët dhe sportistët dëshmon një entuziazëm të lartë për këtë risi në skenën sportive vendase. Garuesi Dren Krasniqi bëri të ditur se deri më tani numri i të regjistruarve ka arritur në 100. “Deri tani janë regjistruar 100 garues, disa për vetëm tre rrathë, disa për gjashtë, e disa për ultramaratonën e plotë. Për çudi, fillimisht interesimi ka qenë më i ngadaltë, por është rritur vazhdimisht, pasi njerëzit e kanë parë se çfarë eventi është dhe sa serioz ka qenë organizimi. Besoj se e kanë parë që është një event shumë i mirë dhe kanë vendosur të marrin pjesë shumë më tepër garues”, tha Krasniqi. Për realizimin me sukses të këtij projekti, organizatorët janë angazhuar gjatë për të siguruar lokacionin ideal dhe kushtet e nevojshme. Rrustemi zbuloi se ideja kishte lindur muaj më parë, por përzgjedhja e terrenit dhe logjistika kërkonin përkushtim maksimal. Përtej aspektit fizik, pjesëmarrësit janë këshilluar të bëjnë përgatitje të detajuara praktike, përfshirë sigurimin e ushqimit, pajisjeve dhe mbështetjes, pasi bëhet fjalë për një provë që mund të zgjasë me orë të tëra. Për t'i dhënë edhe më shumë motivim kësaj gare, përveç prestigjit dhe sfidës personale, organizatorët kanë parashikuar edhe shpërblime financiare për ata vrapues që do të arrijnë të qëndrojnë në pistë për periudha më të gjata kohore.