Fushata sensibilizuese e IKSHPK-së: “Tetori Rozë” shtrihet në çdo cep të vendit me mesazhin për zbulimin e hershëm të kancerit të gjirit

Instituti Kombëtar i Shëndetësisë Publike të Kosovës (IKSHPK) ka vënë në lëvizje të gjitha rajonet e vendit përmes një sërë nismash edukative dhe informuese, në kuadër të muajit tetor që njihet ndërkombëtarisht si muaji i ndërgjegjësimit për kancerin e gjirit. Sipas njoftimit zyrtar, këto angazhime po koordinohen nga Qendrat Rajonale të Shëndetit Publik, të cilat kanë bashkuar forcat me institucionet arsimore, ato shëndetësore dhe aktorë të ndryshëm lokalë për të përcjellë mesazhin e solidaritetit dhe kujdesit shëndetësor. Në qytetin e Pejës, programi përfshiu akte prekëse solidariteti, siç ishte dhurimi i flokëve në shenjë mbështetjeje për gratë që po luftojnë me këtë sëmundje, shoqëruar me sesione të dedikuara informuese për shëndetin. Ndërkohë, Prizreni u shënua nga një simbolikë ndryshe; gratë e mbijetuara së bashku me organizatën “Burrneshat” mbbollën fidanë të rinj, ndërsa në disa zona të ndryshme u mbajtën ligjërata ndërgjegjësuese. Në Mitrovicë u organizua marshimi tradicional si thirrje për vetëdijesim shoqëror, ndërsa në Gjilan, Ferizaj dhe Prishtinë fokusi u vendos tek edukimi përmes ligjëratave në shkolla, institucione publike dhe qendra mjekësore. “Përmes këtyre aktiviteteve, synohet rritja e ndërgjegjësimit për faktorët e rrezikut, njohja e shenjave dhe simptomave, rëndësia e kontrolleve të rregullta dhe zbulimi i hershëm i kancerit të gjirit. Kujdesi për shëndetin fillon me informimin dhe veprimin në kohë! Kontrollohu, për veten, për jetën!”, theksohet në njoftimin e IKSHPK-së.