Tensionohet situata në kryeqytet: Studentët sulmojnë dhe i vënë flakën hyrjes së Ministrisë së Ekonomisë

Protesta e studentëve në kryeqytet ka marrë një kthesë të dhunshme, pasi gjatë marshimit drejt ndërtesës së Kryeministrisë është shënuar një sulm ndaj hyrjes së Ministrisë së Ekonomisë. Demonstruesit kanë thyer me forcë dyert e institucionit në përpjekje për të hyrë brenda, dhe më pas u kanë vënë flakën atyre. Ngjarja ka ndodhur gjatë lëvizjes së turmës nga Ministria e Arsimit drejt Kryeministrisë, pas një tubimi që kishte zgjatur për më shumë se gjashtë orë para dikasterit të arsimit. Flakët janë përhapur në derën e godinës në mungesë të një kordoni policor për ta mbrojtur atë. Pas disa minutash, autoritetet e rendit kanë ndërhyrë duke përdorur gaz lotsjellës për të shpërndarë protestuesit dhe më pas kanë bërë të mundur shuarjen e zjarrit. Kujtojmë se protestat e kësaj të premteje, 16 tetor, janë shtrirë edhe në rajone të tjera të vendit, ku nxënësit e shkollave të mesme dhe studentët kanë zgjedhur të bojkotojnë mësimin. Në qytetin e Lezhës janë shënuar përplasje fizike mes protestuesve dhe efektivëve të policisë, ndërkohë që situata të tensionuara nuk kanë munguar as gjatë tubimit të zhvilluar para Ministrisë së Arsimit në Tiranë.