Bilanci i protestave: 127 të arrestuar në Tiranë, Policia zbulon grupe online që bëjnë thirrje për terrorizëm

Gjatë një deklarate për mediat të zhvilluar të premten, drejtori i Departamentit për Rendin dhe Sigurinë Publike, Dhimitraq Ziu, bëri me dije se vetëm në kryeqytet numri i personave të vënë në pranga ka arritur në 127, ndërsa 244 të tjerë po ndiqen penalisht në gjendje të lirë. Sipas drejtuesit të lartë të policisë, njësitë e specializuara të Antiterrorit dhe ato të Hetimit të Krimit Kibernetik kanë pikasur disa hapësira dhe grupe digjitale komunikimi, ku shpërndahen hapur materiale me natyrë kriminale dhe thirrje alarmante për ndërmarrjen e veprimeve ekstreme dhe terroriste. Në detajet e paraqitura për qarqet e vendit, raportohet se në Tiranë 127 shtetas janë arrestuar dhe 244 të tjerë janë proceduar penalisht për sulme ndaj efektivëve, dëmtim të pronës publike e private, si dhe shkatërrim të institucioneve, bankomateve, kamerave, automjeteve dhe rrethimeve metalike. Ndërkaq, në Durrës janë vënë në pranga 23 persona dhe 12 janë proceduar për kundërshtim me dhunë të policisë dhe zjarrvënie në prona e institucione. Në Korçë janë regjistruar 2 arrestime dhe 23 procedime për dhunë ndaj uniformave blu dhe dëmtim institucionesh. Në Vlorë janë proceduar 20 shtetas për bllokim të procesit mësimor, sulme ndaj efektivëve dhe dëmtime fasadash e pronash. Në Shkodër janë proceduar 9 persona për dhunë ndaj policisë dhe shkatërrime pronash, ndërsa u plagos rëndë një oficer i Rendit i cili ndodhet në Spitalin e Traumës në Tiranë (autori është identifikuar, por për shkak të moshës nuk është ndaluar me burg). Gjithashtu, në Elbasan janë proceduar 6 shtetas për dëmtime xhamash në institucione, sinjalistika rrugore dhe reklama, kurse në Kukës 10 persona janë proceduar për prishje të sinjalistikës dhe tabelave. Si pasojë e akteve të dhunës të drejtuara ndaj forcave të rendit në Tiranë, Durrës, Lezhë, Shkodër dhe Kukës, numri i efektivëve të lënduar ka shkuar në 120. Krahas situatës në terren, ekspertët e krimit kibernetik dhe antiterrorit kanë vënë nën mbikëqyrje hapësirën virtuale. Gjatë këtij monitorimi të vazhdueshëm janë zbuluar kanale ku qarkullojnë mesazhe me përmbajtje të pastër kriminale, përfshirë nxitje për akte terroriste dhe kërcënime serioze ndaj jetës së punonjësve të Policisë së Shtetit. Lidhur me këto zhvillime, autoritetet kanë nisur menjëherë procedimet penale dhe po bashkëpunojnë ngushtë me partnerët ndërkombëtarë për të zbuluar adresat IP, për të identifikuar administratorët e këto kanaleve, si dhe çdo individ tjetër që përhap thirrje për dhunë dhe terrorizëm.