Gjykata Supreme përmbys vendimin: Rikthehet në rigjykim çështja milionëshe e Ndërmarrjes Publike Banesore

Gjykata Supreme ka vendosur që ta kthejë në shkallë të parë për një rigjykim të ri mosmarrëveshjen gjyqësore mes Ndërmarrjes Publike Banesore dhe disa shoqërive tregtare. Trupi gjykues ka gjetur si të mbështetura në ligj kërkesat për revizion të ushtruara nga kompanitë “Made Group Construction” SH.P.K., “Arkos” SH.P.K. dhe “Madekos” SH.P.K., nga vetë pala e paditur Ndërmarrja Publike Banesore SH.A. (NPB), si dhe nga Komuna e Prishtinës në cilësinë e palës ndërhyrëse. Bëhet fjalë për një çështje komplekse juridike-kontestimore që ka të bëjë me zbatimin e marrëveshjeve ose shpërblimin e dëmit pasuror, duke përfshirë dëmin real dhe fitimin e munguar. Kujtojmë se gjatë muajit gusht, vetë Ndërmarrja Publike Banesore kishte bërë publike situatën e rënduar, duke njoftuar se llogaritë e saj financiare kishin përfunduar të bllokuara si pasojë e një ekzekutimi përmbarimor që rridhte pikërisht nga ky konflikt ligjor. Më herët, Gjykata Komerciale kishte marrë vendim që e detyronte ndërmarrjen publike t'u derdhte shumën prej 32.5 milionë eurosh në formë fitimi të humbur tri subjekteve private – “Made Kos”, “Made Group” dhe “Arkos”. Këto kompani kishin lidhur një marrëveshje bashkëinvestimi me NPB-në gjatë vitit 2021, projekt i cili mbeti i parealizuar.