Mbyllet Pakoja e Energjisë: Mbi 200 mijë familje kosovare përfituan nga fondi prej 81 milionë eurosh

Mbi 200 mijë ekonomi familjare në Kosovë kanë marrë mbështetje përmes Pakos së Mbështetjes për Energjinë, e cila u mbështet nga Bashkimi Evropian me 75 milionë euro, ndërsa gjashtë milionë euro shtesë u siguruan nga buxhetimi vendor, duke e çuar shumën e përgjithshme të ndihmës në 81 milionë euro. Këto të dhëna u bënë të ditura gjatë ngjarjes përmbyllëse të “Pakos së Mbështetjes për Energjinë në Kosovë”, aktivitet ky i udhëhequr nga Fondi i Kosovës për Efiçiencë të Energjisë (FKEE). Gjatë fjalës së saj, ministrja e Ekonomisë, Artane Rizvanolli, vlerësoi se ky fond jo vetëm që u erdhi në ndihmë qytetarëve për të tejkaluar muajt e ftohtë të dimrit, por gjithashtu shërbeu si një investim afatgjatë për të ardhmen. Duke shprehur mirënjohje për mbështetjen e Bashkimit Evropian, Rizvanolli theksoi se ndihma erdhi në një periudhë tejet sfiduese jo vetëm për vendin, por për mbarë rajonin dhe kontinentin evropian, sidomos duke marrë parasysh kapacitetet e vjetra prodhuese dhe rritjen e shpejtë të konsumit të energjisë pas vitit 2017. Ministrja po ashtu bëri të ditur se efiçienca e energjisë mbetet shtyllë kryesore e Strategjisë Energjetike, pasi Kosova shënon nivele më të larta të konsumit të energjisë për njësi të prodhimit të brendshëm bruto krahasuar me mesataren evropiane dhe rajonale, shifra këto të ndikuara ndjeshëm edhe nga mënyra e ngrohjes. Në kuadër të këtyre skemave mbështetëse, ajo shtoi se janë ndihmuar gjithashtu 32 mijë familje dhe rreth 150 biznese për pajisjen me teknologji efiçiente për ngrohje dhe pajisje të tjera kursyese. Nga ana e tij, ambasadori i Bashkimit Evropian në Kosovë, Dirk Schuebel, u shpreh se kjo nismë ka prodhuar rezultate të prekshme për përmirësimin e jetës së përditshme të qytetarëve, duke ritheksuar përkushtimin e vazhdueshëm të BE-së si partneri kryesor zhvillimor i vendit që nga viti 1999.