Aksioni i Shehajt dhe Kaprit në komisariate: Denoncohet dhuna ndaj të miturve dhe arrestimet arbitrare

Kryetari i Partisë 'Mundësia', Agron Shehaj, i shoqëruar nga deputeti Erald Kapri, ka zhvilluar një vizitë urgjente gjatë orëve të vona të natës në disa komisariate të kryeqytetit. Nisma e tyre erdhi si reagim ndaj raporteve për një numër të lartë të rinjsh dhe minorenësh të shoqëruar nga forcat e rendit. Gjatë qëndrimit në ambientet e policisë, Shehaj ka kërkuar sqarime të menjëhershme nga efektivët në lidhje me mënyrën e trajtimit të të miturve, duke ngritur shqetësimin për përdorimin e forcës së tepruar gjatë procesit të shoqërimit. Sipas tij, këto veprime janë të motivuara nga përpjekja e qeverisë për të shuar zërin opozitar të qytetarëve që kërkojnë dorëheqjen e kryeministrit Edi Rama. Në një video të publikuar nga vendngjarja, Shehaj denoncoi ashpër sjelljen e policisë ndaj një 17-vjeçari. “E patë si e morët zvarrë? 10 burra mbi një 17-vjeçar. Për Edi Ramën gjithçka, që do pushtetin me çdo kusht”, u shpreh ai gjatë ballafaqimit me efektivët. Deputetët e 'Mundësisë' patën mundësinë të komunikojnë drejtpërdrejt me të rinjtë e ndaluar. Shumë prej tyre dëshmuan se janë ushtruar dhunë fizike ndaj tyre brenda furgonëve të policisë gjatë transportit për në komisariat. Për më tepër, disa nga të ndaluarit pretendojnë se ishin thjesht kalimtarë të rastit kur u ndaluan nga autoritetet. Një nga studentët e ndaluar rrëfeu përvojën e tij: “Isha duke ecur me shokët pranë zonës së Kryeministrisë në drejtim të Bllokut kur na ndaloi policia. Brenda janë 15 djem, disa prej të cilëve kanë shenja të dukshme dhune”. Ndërsa një tjetër i ri aludoi se arrestimet janë bërë në mënyrë të paarsyetuar, thjesht për të plotësuar numrin e personave të shoqëruar.