Vazhdon masat e sigurisë për katër shtetasit pakistanezë që dyshohen për rrëmbimin e dy personave në kryeqytet

Gjykata ka marrë vendim për vazhdimin e masës së paraburgimit për katër shtetasit nga Pakistani, Sanëal Sanaullah, Muhammad Hamza, Yar Muhammed dhe Touseef Ahmed, të cilët po përballen me akuza të rënda për rrëmbimin e dy shtetasve të huaj në Prishtinë, si dhe zhvatjen e 4 mijë funteve për lirinë e njërit prej tyre. Gjatë seancës para trupit gjykues, të pandehurit kanë deklaruar se janë të pafajshëm, duke mohuar çdo përfshirje në veprën penale që u vihet në barrë. Sipas dosjes së prokurorisë, ngjarja dyshohet se ka ndodhur gjatë datave 18 dhe 19 maj 2026. Mësohet se të dyshuarit kanë kapur dhe mbajtur mbyllur me forcë Manish Kumar dhe Hamanta Bhandari brenda një banese të vendosur në rrugën “Shaqir Igrishta” në kryeqytet. Organet e ndjekjes pretendojnë se Manish Kumar është nënshtruar ndaj dhunës fizike, kanosjeve serioze për jetën dhe është kërcënuar me armë zjarri. Për pasojë, ai është detyruar të lidhet me familjarët e tij përmes platformës WhatsApp, duke kërkuar pagesën prej 4 mijë funtesh si kusht për lirinë e tij. Hetimet tregojnë se familjarët e viktimës kanë kryer transferimin e të hollave të kërkuara. Ndaj katër të pandehurve rëndon akuza për veprën penale të rrëmbimit të kryer në bashkëkryerje, e cila është parashikuar nga neni 191, paragrafi 2, pika 2.3, në lidhje me nenin 31 të Kodit Penal të Republikës së Kosovës. Sipas aktakuzës, përveç se janë shtetas pakistanezë që identifikohen me emrat e lartcekur, prokuroria dyshon se ata kanë përdorur edhe identitete të rreme gjatë qëndrimit të tyre. Megjithatë, bazuar në parimet ligjore, të pandehurit gëzojnë prezumimin e pafajësisë derisa fajësia e tyre të vuloset përfundimisht përmes një vendimi gjyqësor të formës së prerë.