Arsenal fishekzjarrësh me vlerë 40 mijë euro në Tiranë, bie në pranga 24-vjeçari që dyshohet se i furnizonte për protestat

Policia e Tiranës ka finalizuar me sukses operacionin e koduar “Fireworks”, duke vënë në pranga një 24-vjeçar, pasi gjatë kontrollit në banesën e tij u zbulua një sasi e madhe prej 344 kutish me lëndë piroteknike të kontrabanduara, vlera e të cilave kap shifrën e rreth 40 mijë eurove. Sipas autoriteteve policore, ky aksion është ndërmarrë mbi bazën e informacioneve operative se i riu kishte kthyer ambientet e shtëpisë së tij në një magazinë të paligjshme. Dyshimet kryesore sugjerojnë se lëndët piroteknike ishin siguruar me qëllim për t’u shitur dhe shpërndarë te personat e maskuar dhe të dhunshëm, të cilët kanë marrë pjesë në protestat e zhvilluara gjatë tri ditëve të fundit në kryeqytet. Në kuadër të operacionit, efektivët e Seksionit për Hetimin e Krimeve Ekonomiko-Financiare arrestuan në flagrancë shtetasin E. R., 24 vjeç. Gjatë kontrollit të ushtruar në katin e parë të banesës së tij, të ndodhur në rrugën “Jargavani”, u gjetën dhe u sekuestruan në cilësinë e provës materiale 344 kutitë e ndryshme me lëndë piroteknike. Grupi hetues, nën drejtimin e Prokurorisë, po vijon intensivisht hetimet për zbardhjen e plotë të kësaj ngjarjeje, si dhe për identifikimin dhe kapjen e personave të tjerë që mund të jenë të përfshirë në këtë rrjet të paligjshëm. Materialet procedurale i kanë kaluar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme ligjore.