Situatë e tensionuar në Lezhë: Gjimnazistët bojkotojnë mësimin, përleshje dhe gurë drejt policisë

Protesta e ndërmarrë ditën e sotme nga një grup gjimnazistësh në Lezhë, pasi bojkotuan orët e mësimit, ka degjeneruar në tensione të larta dhe përplasje të hapura me forcat e rendit. Pasi nuk mundën të futen brenda mjediseve të Bashkisë, situata ka eskaluar kur protestuesit e rinj kanë thyer xhamat e një shkolle të mesme, ndërkohë që kanë shkulur edhe kangjella mbrojtëse dhe tabela të ndryshme të sinjalistikës rrugore. Në këto momente tensioni, situata ka dalë jashtë kontrollit duke sjellë përleshje fizike mes protestuesve dhe efektivëve të policisë, ndaj të cilëve është hedhur breshëri gurësh. Për shkak të rrezikshmërisë dhe agravimit të situatës në terren, zëvendësdrejtori i rendit ka ndërhyrë duke urdhëruar tërheqjen e efektivëve nga zonë e konfliktit.