Aksion i rreptë në kryeqytet: Ndërpritet uji për borxhlinjtë dhe kyçjet e paligjshme

Kompania Rajonale e Ujësjellësit Prishtina ka intensifikuar aksionet në terren, duke vijuar me ndërprerjen e shërbimeve për konsumatorët që nuk kanë shlyer detyrimet financiare, si dhe për ata që janë lidhur në mënyrë të paautorizuar në rrjetin e furnizimit me ujë të pijes. Përmes një njoftimi zyrtar në rrjetet sociale, ndërmarrja ka bërë të ditur se gjatë 24 orëve të fundit janë ndërmarrë shtatë ndërhyrje direkte për shkyçjen e abonentëve debitorë dhe evazionit të ujit brenda territorit të Prishtinës. Kujtojmë se më 15 tetor, KRU Prishtina i pati dhënë një afat prej 10 ditësh konsumatorëve për të shlyer faturat e prapambetura, duke paralajmëruar se mosrespektimi i këtij afati do të sillte masa ndëshkimore dhe ndërprerje të furnizimit. "Ju lutemi që pagesat t’i kryeni me kohë për të shmangur ndërprerjet e mundshme," thuhet në thirrjen e përsëritur të ndërmarrjes drejtuar qytetarëve.