Në gjykatë në Nju Jork: Nicolás Maduro dhe bashkëshortja e tij mohojnë akuzat për torturë

Ish-lideri i Venezuelës, Nicolás Maduro, bashkë me bashkëshortjen e tij, Cilia Flores, dolën para drejtësisë këtë të enjte, ku hodhën poshtë zyrtarisht akuzat e freskëta për komplot me qëllim kryerjen e torturës. Autoritetet amerikane fillimisht e kishin vënë në shënjestër Maduron për narkoterrorizëm, trafikim narkotikësh dhe vepra penale në armëmbajtje, ndërsa javën e shkuar dosja u ngarkua me akuza shtesë ndaj tij dhe Flores. Çifti u arrestua gjatë një aksioni ushtarak amerikan të ndërmarrë në muajin janar, pas të cilit u transportuan në Nju Jork, ku aktualisht mbahen të izoluar në qeli. Të dy të pandehurit deklaruan se nuk janë fajtorë dhe kërkuar rrëzimin e menjëhershëm të kësaj çështjeje penale, duke u thirrur në parimin e imunitetit sovran. Seanca e gjykimit përfundimtar është caktuar të mbahet në qershor të vitit 2027. Sipas aktakuzës së re të dorëzuar nga prokuroria javën e kaluar, dyshja akuzohet se ka ngritur dhe drejtuar “një mekanizëm të egër represioni”, i cili rezultoi në vrasjen, ngacmimin dhe torturimin e mijëra qytetarëve venezuelianë. Gjatë seancës dëgjimore, Maduro refuzoi me forcë pretendimet e ngritura nga administrata amerikane, duke i cilësuar ato si akuza dhe dëshmi të rreme në adresë të tij. “Unë e hedh poshtë plotësisht këtë dokument”, u shpreh ai në gjuhën spanjolle nëpërmjet interpretuesit zyrtar. Gjykatësi Alvin Hellerstein ndërhyri për të shënuar zyrtarisht se gjykata po regjistronte deklaratën e pafajësisë për ish-presidentin. “Jam plotësisht i pafajshëm. Nuk jam fajtor”, u shpreh nga ana e saj Flores, gjithashtu përmes përkthyesit. Të veshur me uniformat standarde të burgut ngjyrë bezhë, Maduro dhe Flores shfaqeshin me shenja të dukshme të rënies në peshë gjatë periudhës së paraburgimit në Brooklyn. Sipas dokumentit të akuzës, praktikat e dhunës përfshinin “goditje me rrymë, asfiksi, përdhunim, zhveshje të detyruar, izolim të zgjatur, uri, qeli ndëshkimi dhe torturë psikologjike”. Shtetet e Bashkuara ngarkojnë gjithashtu Maduron me përgjegjësi për urdhërimin e këtyre metodave ndaj personave specifikë, duke pretenduar se mes viktimave të këtij sistemi ka pasur edhe shtetas amerikanë. Prokurorët federalë kanë ngritur më parë akuza edhe ndaj djalit të tyre dhe disa bashkëpunëtorëve, për përfshirje direkte në rrjete të trafikut të kokainës dhe bashkëpunim me kartele të shpallura organizata terroriste. Në të kaluarën, Maduro i ka zhvlerësuar këto akuza, duke i quajtur ato një skenar “imperialist” për të vënë nën kontroll burimet e mëdha të naftës që zotëron Venezuela. Mbrojtja ligjore e çiftit këmbëngul se arrestimi i tyre nga forcat amerikane është tërësisht i paligjshëm, pasi Maduro gëzon mbrojtje ligjore si udhëheqës i një shteti sovran. Ndërkohë, Cilia Flores pati paraqitur një kërkesë për lirim me kusht, e cila iu refuzua, ndërsa ajo pretendonte se vuan nga sëmundje të zemrës dhe probleme të tjera shëndetësore brenda Qendrës së Paraburgimit Metropolitan në Brooklyn.