Skandali me tregtimin e ndikimit/ Vance reagon ashpër për rastin Guilfoyle: Tregtimi i aksesit në Shtëpinë e Bardhë është i neveritshëm, duhet ndëshkim

Zëvendëspresidenti i Shteteve të Bashkuara, J.D. Vance, ka dënuar me tonet më të ashpra çdo përpjekje për të shitur akses te zyrtarët e administratës amerikane, duke e cilësuar këtë dukuri si “të neveritshme” dhe “të përçmueshme”. Reagimi i tij i prerë vjen pas akuzave të rënda ndaj Kimberly Guilfoyle, ish-ambasadores amerikane në Greqi, e cila u largua nga detyra mes raportimeve për sjellje të papërshtatshme. Në një fragment të intervistës për emisionin “CBS Evening News”, e cila do të transmetohet të shtunën, Vance nënvizoi se çdo individ që përpiqet të përfitojë materialisht duke ofruar hyrje te zyrtarët e lartë shtetërorë duhet të përballet me drejtësinë. “Para së gjithash, nëse dikush po shet akses në Shtëpinë e Bardhë, kjo është e neveritshme dhe e përçmueshme dhe duhet të vuajë pasojat”, u shpreh hapur numri dy i Shtëpisë së Bardhë. Kjo deklaratë pason pretendimet e bëra publike nga Eric Deters, një ish-donator i Donald Trump. Sipas Deters, Guilfoyle i kishte kërkuar një transferta prej 100 mijë dollarësh për të mbuluar një borxh të kartës së kreditit, pak ditë përpara se Senati të konfirmonte emërimin e saj si ambasadore. Në këmbim të kësaj shume, ajo i kishte garantuar atij mbështetje dhe qasje të drejtpërdrejtë brenda administratës Trump. Megjithatë, zëvendëspresidenti Vance sqaroi se synon të mbajë një qëndrim të matur dhe të mbështetur plotësisht në fakte të provuara. “Dua të formoj një mendim për këto çështje bazuar në fakte dhe jo në ndonjë raport të rastësishëm mediatik që kam lexuar”, vuri në dukje ai. I pyetur mbi mundësinë e bashkëpunimit të administratës me organet e drejtësisë dhe fletëthirrjet e mundshme gjyqësore për çështjen Guilfoyle, Vance siguroi se qeveria amerikane do të veprojë në përputhje me ligjin. “Sigurisht që do të veproja. Dëgjoni, ne ndjekim ligjin”, tha Vance. Kimberly Guilfoyle, e cila mori zyrtarisht detyrën si ambasadore e SHBA-së në Greqi në shtator të vitit 2025, përfundoi në qendër të hetimeve pas dyshimeve për kërkim parash në këmbim të favoreve politike, pranimin e dhuratave me vlerë të madhe dhe përfshirjen e paautorizuar të një lobisti në takime zyrtare. Nga ana tjetër, avokatët mbrojtës të Guilfoyle i kanë hedhur poshtë të gjitha akuzat, duke pretenduar se shuma prej 100 mijë dollarësh e përmendur nga Deters ishte thjesht një pagesë e prapambetur për shërbime konsulence dhe ligjërime. Aktualisht, Departamenti amerikan i Shtetit po vijon hetimet për të zbardhur plotësisht këtë çështje.