Pasojat e protestës në Tiranë, Rama inspekton dëmet: Nuk është lëvizje studentore, por pengmarrje me maska

Kryeministri Edi Rama ka zhvilluar një vizitë në zonat e prekura nga trazirat e një dite më parë në kryeqytet, duke u ndalur pranë njërës prej strukturave tregtare të djegura plotësisht. Gjatë këtij inspektimi, kreu i ekzekutivit vuri në dukje se pas këtyre sipërmarrjeve modeste fshihen vitet e mundit, djersës dhe sakrificave të familjeve të ndershme. Duke folur nga tereni i dëmtuar, kreu i qeverisë theksoi se bizneset e vogla përfaqësojnë djersën, shpresat dhe ëndrrat e prindërve që përpiqen të sigurojnë jetesën e përditshme me ndershmëri. “Kjo është gremadha e jetës, e punës, e mundit, djersës, ëndrrave e shpresës së një familjeje të zakonshme”, u shpreh Rama, teksa u drejtohej drejtpërdrejt tregtarëve të dëmtuar nga aktet e dhunës. Në vijim të fjalës së tij, ai u dha garanci qytetarëve se shteti do t'ju gjendet pranë dhe se të prekurit nuk do të mbeten të vetëm përballë kësaj situate. “Dua t’u them atyre që sot janë me lot në sy para gremadhave të ngjashme dhe që jetojnë me një sipërmarrje të vogël në Tiranë se nuk janë vetëm. Sapo kjo flakë të kalojë, do të jemi aty të gjithë bashkë”, deklaroi kryeministri. Duke kujtuar sfidën e rëndë të tërmetit që tronditi vendin, Rama solli në vëmendje aftësinë e shqiptarëve për t'u bërë bashkë dhe për të përballuar pasojat përmes solidaritetit. Ndërkohë, ai hodhi poshtë çdo lidhje mes tubimit dhe kauzës së studentëve, duke argumentuar se shkatërrimi i pronës dhe vënia e flakës bizneseve nuk kanë asgjë të përbashkët me shqetësimet e tyre legjitime për një të ardhme më të mirë. “Kjo s’ka lidhje fare me studentët. Kjo flakë nuk është flakë studentore”, u shpreh Rama, i cili e etiketoi ngjarjen si një “pengmarrje të qytetit me maska”, ndërsa fajësoi opozitën se fshihet pas kësaj forme proteste, duke e akuzuar se përsërit skenarë shkatërrues për vendin.