Tensioni në Tiranë, Rama: Nuk do të gjunjëzohemi para dhunës për hir të një qetësie të rreme

Kryeministri Edi Rama ka bërë sërish një reagim lidhur me situatën e tensionuar dhe protestat e zhvilluara në kryeqytet, duke theksuar se aktet e dhunës në rrugë nuk kanë asnjë lidhje me kauzën dhe shqetësimet e studentëve. Gjatë fjalës së tij, kreu i qeverisë drejtoi akuza të forta ndaj opozitës dhe aktorëve të huaj, për të cilët tha se po përpiqen të bllokojnë rrugëtimin europian të vendit. Ai u shpreh se ngjarjet e fundit dhe bllokimi i qytetit nuk përfaqësojnë aspak aspiratat e të rinjve për një jetë më të mirë, por janë pjesë e një skenari të përsëritur nga e njëjta dorë që ka dëmtuar Shqipërinë në të kaluarën. Rama ngriti shqetësimin për përfshirjen e të miturve në këto protesta, duke pyetur se si mund të nxirren fëmijët me maska për të dëmtuar infrastrukturën dhe për të sulmuar efektivët e policisë. Ai e cilësoi këtë si një rrezikim të jetës së tyre për llogari të agjendave të errëta dhe ndërhyrjeve të huaja, të cilat sipas tij nuk e duan Shqipërinë të qetë dhe pjesë të Bashkimit Europian. Kryeministri theksoi se këto zhvillim nuk janë aspak rastësore, por përkojnë me momentet kur vendi i afrohet objektivave të tij historike. Ai e cilësoi situatën aktuale si një provë karakteri për shoqërinë shqiptare përballë pengesave artificiale. Në përmbyllje, Rama pranoi se studentët, sipërmarrësit dhe qytetarët kanë të drejtë të kërkojnë standarde më të larta dhe se problemet kërkojnë zgjidhje. Megjithatë, ai ishte i prerë në vendimin e tij se qeveria nuk do të tërhiqet dhe se dorëzimi para dhunës për të fituar një qetësi momentale do të thotë humbje e rrugës dhe e së ardhmes në planin afatgjatë.