Përkujtohet 29-vjetori i rënies heroike të dëshmorit Adrian Krasniqi, luftëtarit të parë me uniformë të UÇK-së

Sot shënohet 29-vjetori i rënies në altorin e lirisë të dëshmorit të kombit, gjeneralmajor Adrian Krasniqi, i cili humbi jetën heroikisht gjatë një aksioni të ndërmarrë nga Ushtria Çlirimtare e Kosovës kundër stacionit të policisë serbe në Kliçinë, afër Pejës. Ky objekt shërbente si një pikë kyçe strategjike për forcat ushtarake dhe policore të regjimit pushtues. I lindur më 11 tetor 1972, Adrian Krasniqi hyri në historinë e vendit si luftëtari i parë i rënë në vijën e frontit i veshur hapur me uniformën e UÇK-së. Ai ishte student në Fakultetin Ekonomik të Universitetit të Prishtinës dhe një nga figurat kryesore të celulave të para të rezistencës së armatosur, duke mbajtur detyrën e komandantit të logjistikës në nivel të Shtabit të Përgjithshëm të UÇK-së, ndërsa titullin e gjeneralmajorit e fitojë pas vdekjes. Krasniqi radhitej mes atyre trimave që sfiduan haptazi dhunën e regjimit serb në një periudhë kur çdo e drejtë elementare njerëzore ishte e mohuar gjatë okupimit shumë dekadash të Kosovës, përpjekje këto që kurorëzuan më në fund çlirimin e vendit më 12 qershor 1999. Për këtë sulm të guximshëm të forcave tona, autoritetet e atëhershme policore serbe kishin publikuar dikur edhe një xhirim zyrtar.