Asllani shënon, por Hoffenheimi dorëzohet në shtëpi para Besiktasit në Ligën e Evropës

Hoffenheimi ka pësuar humbje në shtëpi me rezultatin 2-3 përballë Besiktasit, në kuadër të xhiros së dytë të fazës së ligës në Ligën e Evropës, pavarësisht paraqitjes dhe golit të sulmuesit të Kombëtares së Kosovës, Fisnik Asllani. Pjesa e parë u mbyll e qetë, ndërsa zhvillimi i ndeshjes mori kthesë në minutën e 60-të, kur skuadra turke zhbllokoi shifrat përmes Michael Murillo, i cili u tregua i vëmendshëm duke shënuar pas një topit të kthyer brenda zonës. Reagimi i gjermanëve ishte i menjëhershëm dhe dhjetë minuta më vonë, në minutën e 68-të, sulmuesi kosovar Fisnik Asllani rivendosi barazinë në fushë, duke realizuar një gol spektakolar nga distanca me një goditje të saktë në këndin e poshtëm të portës kundërshtare. Megjithatë, festa e vendasve zgjati shumë pak, pasi Besiktasi riktheu avantazhin vetëm katër minuta më vonë. Hyeon-Gyu Oh shënoi në minutën e 72-të, ndërsa në minutën e 79-të realizoi edhe golin e tij të dytë personal për t'i dhënë epërsinë prej 1-3 skuadrës turke, pas një asistimi nga Ilhan Fakili. Pavarësisht disavantazhit, Hoffenheimi nuk u dorëzua dhe ngushtoi diferencën në 2-3 në minutën e 87-të, kur Koki Machida dërgoi topin në rrjetë me kokë pas harkimit nga këndi të Vladimir Coufalit. Edhe pse vendasit shtuan presionin në minutat e mbetura të takimit në kërkim të barazimit, gjiganti turk arriti të menaxhojë avantazhin dhe të sigurojë tri pikë tejet të vlefshme si mysafir. Pas këtij raundi, Besiktasi ngjitet në kuotën e gjashtë pikëve pas dy ndeshjeve të para, ndërkohë që Hoffenheimi mbetet ende pa shije fitoreje në këtë fazë të garës.