Nga qelia në Hagë, Hashim Thaçi surprizon me një mesazh prekës gazetarin e njohur kosovar

Ish-presidenti i Kosovës, Hashim Thaçi, ka përcjellë një mesazh plot emocione për moderatorin e emisionit “DPT te Fidani” në Klan Kosova, Fidan Jupollit, gjatë qëndrimit të tij në paraburgim në Hagë. Këtë ngjarje e ka bërë të ditur vetë gazetari në hapje të emisionit të tij, duke shpjeguar se fjalët e ish-kreut të shtetit i janë transmetuar përmes një miku të përbashkët që sapo e kishte vizituar atë në qendrën e paraburgimit në Holandë. “Përkrahjen e tij, fjalët më të mira të tij. U emocionova! U emocionova jo për diçka, sepse me zotëri Thaçin kemi pasur polemika politike goxha shumë, por kurrë nuk kam harru që ata janë heronjtë e mi. Politikisht servilin prej tyre i kam kritikuar, sepse natyra e emisionit tim është e tillë. U emocionova dhe më dolën lotët, sepse secili prej nesh kemi pasur familjarë të burgosur në kohën e Jugosllavisë, të Serbisë, të Krajlit, të Rankoviqit, të Sllobës… mundësia e një letre ka qenë e mundur, te kjo Gjykatë nuk është e mundur. U preka e u emocionova për shkak të këtij mesazhi. U preka e u emocionova për të kaluarën. U preka e u emocionova edhe për të tashmen. U preka e u emocionova njëherit për jomirënjohjen tonë si shoqëri ndaj këtyre njerëzve. U preka e u emocionova në 2026, djemtë kur i kanë pasur nga 18 vjet i kanë dalë përballë një makinerie qysh ka qenë Jugosllavia, pas luftës, sakrificës, shokëve të vrarë, betejave të fituara, padrejtësisht mbahen nga një gjykatë e padrejtë politike jashtë vendit”, ka deklaruar Jupolli mes emocionesh. Në fjalën e tij, gazetari ka shprehur mirënjohjen ndaj ish-presidentit dhe ka ndarë mesazhe përshëndetëse edhe për udhëheqësit e tjerë të UÇK-së që po mbahen atje, Kadri Veselin, Jakup Krasniqin dhe Rexhep Selimin. “President, faleminderit për mesazhin. Mezi po pres me dalë e me t’pasë pjesë të satirës time, me t’pa në politikë, e me t’pasë në intervista hard-core qysh i këna ba gjithë. E përshëndes edhe Kadrinë prej këtu, e mora vesh që po më kqyrni, bacën Jakup, edhe një mesazh Rexhep Selimit. Rexhë, herën e fundit kur t’pash në Hagë, ma ke rrëzu dorën. Po du me t’kallxu që e kam ushtru dirën goxha shumë. Po shpresoj që keni me u kthy këtu, ose vi. Dorën e kam ushtru, kur të duash e shtyjmë, dhe ma se ha foren si të hi mrena me hanger mirë, sepse me Milka atë ditë më rrëzove, ma ule tensionin”, u shpreh ai. Në mbyllje të rrëfimit të tij, Jupolli u ndal te një mesazh dedikuar djemve të tij, Gegës dhe Osos, duke u bërë thirrje që të mbajnë kokën lart për sakrificën dhe historinë e lavdishme të Ushtrisë Çlirimtare të Kosovës. “Dhe një mesazh prej këtu po du me ua çu djemve të mi, Gegës dhe Osos, të cilët nuk i kanë marrë aq lehtë akuzat. Nuk mujsha me ua shpjegu lehtë e thjeshtë pse po iu dhemb njerëzve a je me UÇK-në a me Millosheviqin, pra nuk t’ka ble Vuçiqi. Gegë dhe Oso: babi është UÇK, na jem UÇK. Gegë, a pe sheh që përveç Rexhës, e kemi shok edhe Hashim Thaçin edhe Kadri Veselin. Babi këtë po e bën për krenarinë e dinjitetin që ju kur të rriteni me mbajt kryt lart, me ditë që këtë liri nuk e ka pru zogu, e ka pru UÇK-ja, këta djem. A pe sheh që jemi UÇK, Gegë, prandaj mbajeni kokën lart. E ata tjerët që e shajnë UÇK-në, Gegë, ata janë me Millosheviqin e Vuçiqin”, përfundoi gazetari Jupolli.