Tensionet në vend, Presidenti Begaj lëshon apelin e fortë: Braktisni dhunën dhe jepni hapësirë dialogut

Kreu i shtetit shqiptar, Bajram Begaj, ka ndërhyrë publikisht pas zhvillimeve të fundit dhe përplasjeve të regjistruara gjatë protestave, duke kërkuar nga qytetarët dhe faktorët politikë e shoqërorë që të tregojnë vetëkontroll dhe të orientohen drejt bisedimeve paqësore. Duke analizuar situatën, Presidenti vuri në dukje se aspiratat dhe pakënaqësitë e qytetarëve, e sidomos të brezit të ri, meritojnë vëmendje të plotë institucionale e shoqërore, por shtoi prerazi se aktet e dhunës nuk mund të shërbejnë kurrë si mjet për arritjen e qëllimeve. Në mesazhin e tij drejtuar opinionit publik, Begaj kërkoi mbrojtjen e rendit demokratik dhe angazhimin e përbashkët për të ulur gjakrat, duke theksuar se e ardhmja e Shqipërisë dhe e rinisë së saj kërkon bashkëpunim e jo përçarje. “Shqipëria është atdheu ynë i përbashkët. Ajo është shtëpia e të gjithëve. Kam ndjekur protestat, kërkesat, por me keqardhje edhe aktet e dhunës së dy ditëve të fundit. Zëri i çdo qytetari meriton të dëgjohet, veçanërisht zëri i të rinjve, të cilët përfaqësojnë shpresën dhe të ardhmen e vendit tonë. Këtë s’mund ta verë dhe nuk e vë askush në diskutim. Por dhuna nuk është dhe nuk mund të jetë kurrë zgjidhja. Ajo dëmton shoqërinë, cenon sigurinë e qytetarëve dhe polarizon bashkëjetesën demokratike. Në këto momente, vendi ynë ka nevojë për qetësi, përgjegjshmëri dhe dialog. Ka nevojë që dallimet të mos na përçajnë, por të na nxisin të dëgjojmë njëri-tjetrin dhe të gjejmë zgjidhje në interes të qytetarëve dhe të Shqipërisë. U bëj thirrje të gjithëve të zgjedhin maturinë, të shmangin dhunën dhe të mos lejojnë që tensionet të cenojnë rendin kushtetues dhe stabilitetin e vendit. Inkurajoj forcat e rendit në detyrën e tyre tejet delikate dhe uroj shërim të shpejtë për çdo të lënduar, polic apo protestues. Me përgjegjësinë dhe tagrat që më jep Kushtetuta, mbetem i hapur për këdo që dëshiron të ketë një hapësirë dialogu dhe mirëkuptimi sikurse i bëj thirrje aktorëve të përfshirë t’i përkushtohen dialogut dhe bashkëpunimit, në të mirë të rinisë, në të mirë të Shqipërisë”, u shpreh presidenti Bajram Begaj.