Deputeti serb shpërthen në Kuvend: Lista Serbe është organizatë kriminale që tentoi të më eliminojë

Lazar Radulloviq, deputet i Partisë për Liri, Drejtësi dhe Mbijetesë, ka hedhur akuza të rënda ndaj Listës Serbe, duke e cilësuar atë si një organizatë kriminale që ka përdorur frikësimin, presionin dhe sulmet për të bllokuar hyrjen e tij në Kuvend. Gjatë fjalës së tij para ligjvënësve në seancën e sotme plenare, Radulloviq u shpreh se kishte një borxh moral për t'u kundërpërgjigjur deputetëve të këtij subjekti politik, të cilët gjatë fushatës zgjedhore kishin dërguar ankesa në Gjykatën Supreme për ta diskualifikuar nga gara. Duke iu drejtuar kolegëve të tij, ai theksoi se integriteti i tij është i pashitshëm dhe se përpjekjet e tyre për ta nënshtruar kanë dështuar plotësisht. Radulloviq përmendi edhe incidentet e fundit me të cilat është përballur, duke përfshirë dhunën fizike dhe dëmtimin e automjetit të tij përmes shpërthimit të gomave. Sipas tij, përpjekjet për ta larguar nga skena politike mund të arrijnë sukses vetëm me eliminim fizik, ndërsa shtoi se përfaqësuesit e Listës Serbe nuk janë gjë tjetër veçse ekzekutorë të urdhrave që vijnë nga Beogradi, duke ritheksuar se kërcënimet e tyre nuk do t'ia thyejnë kurrë vullnetin.