Forma e jashtëzakonshme e Joao Cancelos mund t'i japë Barcelonës një zgjidhje të re në sulm

Joao Cancelo po kalon një nga fazat më të artuara të edicionit aktual, duke bërë bujë jo vetëm për detyrat defensive, por edhe për kontributin e jashtëzakonshëm në repartin e sulmit. Falë paraqitjeve mbresëlënëse së fundmi, drejtuesit dhe stafi teknik në Barcelonë po marrin në konsideratë një ide mjaft interesante dhe të pazakontë: përdorimin e tij të mundshëm si qendërsulmues. Burimet nga shtypi spanjoll bëjnë me dije se anësori portugez po i vë në pah cilësitë e larta teknike, shpejtësinë dhe leximin e shkëlqyer të lojës, duke u shndërruar në një armë shtesë për trajnerin Hansi Flick. Në tetë sfidat e fundit të luajtura mes klubit katalunas dhe kombëtares portugeze, Cancelo ka arritur të lërë shenjë me katër gola dhe një asistim. Statistikat ndahen barabar, ku katër prej këtyre ndeshjeve i ka regjistruar me fanellën e klubit nga “Camp Nou” dhe katër të tjerat nën urdhrat e Përfaqësueses së Portugalisë. Ndikimi i tij u pa qartë edhe në triumfin 4-1 të Barcelonës ndaj Galatasarayt në Ligën e Kampionëve, ku portugezi konfirmoi edhe kësaj radhe formën e lartë. Aty, Cancelo ishte autor i golit të barazimit për katalunasit, duke i dhënë hov skuadrës për të përmbysur rezultatin pas kalimit të hershëm në epërsi të kundërshtarit. Përveç kësaj, ai kishte shënuar po ashtu ndaj Racing Santanderit, kurse me fanellën e vendit të tij pati tundur rrjetën kundër Danimarkës dhe Norvegjisë. Tendenca e tij për të depërtuar në zonën e rrezikut, për të gjeneruar raste shënimi dhe për të finalizuar aksionet e dëshmon shkathtësinë e tij të lartë taktike. Duke pasur parasysh mungesën e Raphinhas, shtabi teknik i Barcelonës po analizon opsionet për të ruajtur të paprekur efikasitetin në fazën e sulmit. Cancelo mund të shërbejë si një zgjidhje e papritur në rolin e sulmuesit të rremë, ku lëvizjet e tij mund të hapin hapsira jetike dhe të ndihmojnë në organizimin e lojës. Sigurisht, funksioni primar i portugezit mbetet ai i mbrojtësit të krahut, mirëpo atributet e tij ofanzive mund t'i ofrojnë Flickut fleksibilitet në çastet kur ekipi kërkon më shumë krijimtari dhe depërtime. Me kalendarin që sjell duele tejet sfiduese në vazhdim, përfshirë përballjet me Real Betisin, Paris Saint-Germainin dhe Real Madridin, rendimenti i Cancelos pritet të jetë përcaktues për ecurinë e skuadrës. Mbetet të shihet nëse trajneri gjerman do ta vërtetojë në praktikë këtë skemë taktike apo do ta besojë lojtarin në pozicionin e tij amë, ku ai tashmë po dëshmon se di të bëjë diferencën në të dyja krahët e fushës.