Zbardhet orari i plotë: Ja kur do të zhvillohen përballjet e xhiros së 10-të në elitën e futbollit vendor

Pasi u mbyll zyrtarisht rrethi i parë me xhiron e nëntë, Liga e Parë e futbollit të Maqedonisë së Veriut është gati të hapë siparin e fazës së dytë këtë fundjavë, ku do të luhen takimet e xhiros së 10-të. Institucionet përgjegjëse kanë publikuar tashmë orarin zyrtar dhe datat e sakta për të gjitha sfidat e kësaj jave, duke i dhënë mundësi tifozëve të bëhen gati për një tjetër fundjavë futbollistike plot emocione. Java e 10-të do të hapë dyert të shtunën me dy ndeshje shumë interesante. Spektakli nis në orën 12:00, ku Shkëndija e Haraçinës do të matë forcat me Strugën, ndërsa nga ora 14:00 fushën e blertë do ta zënë Bregallnica dhe Vardari. Emocionet do të vazhdojnë edhe të dielën. Në këtë ditë, Bashkimi do të presë skuadrën e Sileksit, kurse Shkëndija e Tetovës do të udhëtojë për një transfertë delikate kundër Skopjes. Ky raund i kampionatit do të ulë siparin të hënën me ndeshjen e vetme mes Arsimit dhe Tikveshit, e cila është parashikuar të nisë në orën 14:00.